Hokim yordamchilari tizimining joriy qilinishi, mamlakatimizda kambag‘allikka qarshi kurashishga qaratilgan siyosatda keskin burilish yasaydi

Hokim yordamchilari tizimining joriy qilinishi, mamlakatimizda kambag‘allikka qarshi kurashishga qaratilgan siyosatda keskin burilish yasaydi

03.12.2021 yilda “Mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchilari faoliyatini tashkil etish chora-tadbirlari to‘g‘risida”gi Prezident qarori qabul qilindi.

2022 yil 1 yanvardan har bir shaharcha, qishloq, ovulda, shuningdek, har bir mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha tuman (shahar) hokimining yordamchisi lavozimi ta’sis etildi.

Hokim yordamchilarining tavsiyalari asosida oilaviy tadbirkorlikni rivojlantirish dasturlari doirasidagi kreditlar; Bandlikka ko‘maklashish davlat jamg‘armasi va Jamoat ishlari jamg‘armasi, Fermer, dehqon xo‘jaliklari va tomorqa yer egalarini qo‘llab-quvvatlash jamg‘armasi, “Ayollar daftari” jamg‘armasi, “Yoshlar daftari” jamg‘armasi hisobidan tadbirkorlik faoliyatini yo‘lga qo‘yish, o‘zini o‘zi band qilish va ish bilan ta’minlash uchun ajratiladigan subsidiyalar beriladi.

Shundan kelib chiqib Prezident Administratsiyasi huzuridagi Iqtisodiy tadqiqotlar va islohotlar markazi (Markaz) direktori Obid Hakimov “O‘zbekiston 24” telekanalining “Tahlilnoma” dasturiga bergan intervyusida quyidagilarni ta’kidladi:

“Hokim yordamchilari tizimining joriy qilinishi, mamlakatimizda kambag‘allikka qarshi kurashishga qaratilgan siyosatda keskin burilish yasaydi. Davlatning markaziy darajada qabul qilgan islohotlari hokim yordamchilari yordamida avvalo, viloyatlar, tumanlar qolaversa, mahallalar darajasiga olib kiriladi. Zero, davlatimiz rahbari ta’kidlaganlaridek, hokim yordamchilari bu prezidentning mahallalardagi vakili bo‘lib, ular har kuni aholi bilan ishlab, odamlarga davlat tomonidan yaratilayotgan moliyaviy imkoniyatlarni yetkazishi qolaversa, tadbirkorlik va dehqonchilikka o‘rgatish orqali kambag‘allikdan chiqishiga xizmat qiluvchi insondir.

Aholining eng quyi qatlamlari bilan ishlab, ularning muammolari yechimi bilan shug‘ullanuvchi va o‘sha yerda davlat siyosatini yurg‘izadigan siyosat olib borish ko‘zda tutilgan. Birgina Xitoy davlatini misol qiladigan bo‘lsak, aholining kambag‘allikda hayot kechiruvchi qatlamini kambag‘allikdan olib chiqish uchun hokim yordamchilari tizimiga o‘xshash tizim joriy qilindi. Ushbu tizim doirasida 3 mlndan ortiq yuqori malakali kadrlar aholining quyi qatlamlari orasida yurib, dardini o‘rganib mamlakatning qariyb 800 mln aholisini kambag‘allik chegarasidan olib chiqdi. Bunday misollar jumlasiga Koreyadagi “Yangi qishloq” dasturini ham keltirish mumkin”, deydi Markaz rahbari.

Hozirgi kunda o‘z faoliyatini boshlagan 9309 nafar hokim yordamchilari faoliyatini nazorat qiluvchi maxsus agentlik tashkil etildi.

Hokim yordamchilari har bir xonadonni individual yondashgan holda o‘rganadi va ushbu o‘rganishlarni olib borish uchun toifalarga ajratilgan so‘rovnomalar tuzilgan. Aholining sharoit va muammolaridan kelib chiqib so‘rovnomalar farq qiladi.

Hozirgi kunda mamlakatimizda istiqomat qilayotgan 30 foiz uy xo‘jaliklari ijtimoiy himoyaga muhtoj hisoblanadi. Ushbu oilalarning har biriga individual tarzda yondashilib, “yo‘l xarita” lari ishlab chiqiladi.

Misol uchun, bir xo‘jalik doirasida oladigan bo‘lsak, ushbu oilaning muammosi aniqlangach, muammoni yechishda ishtiroki zarur bo‘lgan muassasalar masalan, tijorat banklari, vazirliklar, hokimliklar nima ish qilishi kerakligi aniq ko‘rsatilgan yo‘l xaritasi tuzuladi.

Respublika miqyosida oladigan bo‘lsak, 10 trln. so‘m kreditlarga va 2,5 trln. so‘m mablag‘ subsidiyalarga ajratildi. Bundan bilishimiz mumkinki, har bir mahallaga ushbu tizimni moliyalashtirish uchun 1,3 mlrd. so‘m mablag‘ ajratiladi. Qolaversa, ba’zi bir viloyatlarda soliqlardan ortgan mablag‘larni hokim yordamchilariga taqsimlashmoqda.

Birgina Jizzax viloyatining Sharof Rashidov tumanida faoliyatini boshlagan hokim yordamchisining ta’kidlashicha hozirda uning tassarufida 2 mlrd. mablag‘i bor.

Mamlakatimiz rahbari tomonidan har bir hokimga har kuni kamida bitta yangi ish o‘rni yaratish vazifasi belgilab berildi. Bir oyda kamida 30 ta yangi ish o‘rni yaratiladi. Buni amalga oshirishda tadbirkorlik bilan hug‘ullanish niyati mavjud bo‘lgan aholiga tadbirkorlikni amalga oshirish uchun zarur bo‘lgan ma’lumotlar beriladi va yo‘l-yo‘riq ko‘rsatiladi. Tadbirkorlik bilan shug‘ullanish niyati mavjud bo‘lmagan aholi uchun o‘sha mahallada amalga oshirilayotgan investitsiya loyihalari yoki yangi ochilayotgan tashkilotlardan ularga ish o‘rni topib berishi zarur hisoblanadi. Qisqacha qilib aytganda bandlikni oshirishga katta e’tibor qaratilgan.

Ushbu islohotlarning samarali natijasini baholash uchun bir qancha ko‘rsatkichlar tizimi ishlab chiqilmoqda, misol uchun, har bir mahallada aholi jon boshiga to‘g‘ri keluvchi daromad darajasi yoki har bir mahallada tadbirkorlar soni, o‘zlashtirilayotgan tomorqalar hajmi va hokozolarni qamrab oluvchi ko‘rsatkichlar tizimi yaratilmoqda va joriy yilning fevral oyidan boshlab ushbu ko‘rsatkichlar asosida baholash tizimi joriy qilinadi. Baholash deganda har bir hokim yordamchisining faoliyati shu ko‘rsatkichlar tizimi orqali baholanib rag‘batlantiriladi yoki chora ko‘riladi” deydi Obid Hakimov.

Maqolani ulashing

O'xshash yangiliklar