Ҳоким ёрдамчилари тизимининг жорий қилиниши, мамлакатимизда камбағалликка қарши курашишга қаратилган сиёсатда кескин бурилиш ясайди

Ҳоким ёрдамчилари тизимининг жорий қилиниши, мамлакатимизда камбағалликка қарши курашишга қаратилган сиёсатда кескин бурилиш ясайди

03.12.2021 йилда “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида”ги Президент қарори қабул қилинди.

2022 йил 1 январдан ҳар бир шаҳарча, қишлоқ, овулда, шунингдек, ҳар бир маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман (шаҳар) ҳокимининг ёрдамчиси лавозими таъсис этилди.

Ҳоким ёрдамчиларининг тавсиялари асосида оилавий тадбиркорликни ривожлантириш дастурлари доирасидаги кредитлар; Бандликка кўмаклашиш давлат жамғармаси ва Жамоат ишлари жамғармаси, Фермер, деҳқон хўжаликлари ва томорқа ер эгаларини қўллаб-қувватлаш жамғармаси, “Аёллар дафтари” жамғармаси, “Ёшлар дафтари” жамғармаси ҳисобидан тадбиркорлик фаолиятини йўлга қўйиш, ўзини ўзи банд қилиш ва иш билан таъминлаш учун ажратиладиган субсидиялар берилади.

Шундан келиб чиқиб Президент Администрацияси ҳузуридаги Иқтисодий тадқиқотлар ва ислоҳотлар маркази (Марказ) директори Обид Ҳакимов “Ўзбекистон 24” телеканалининг “Таҳлилнома” дастурига берган интервьюсида қуйидагиларни таъкидлади:

“Ҳоким ёрдамчилари тизимининг жорий қилиниши, мамлакатимизда камбағалликка қарши курашишга қаратилган сиёсатда кескин бурилиш ясайди. Давлатнинг марказий даражада қабул қилган ислоҳотлари ҳоким ёрдамчилари ёрдамида аввало, вилоятлар, туманлар қолаверса, маҳаллалар даражасига олиб кирилади. Зеро, давлатимиз раҳбари таъкидлаганларидек, ҳоким ёрдамчилари бу президентнинг маҳаллалардаги вакили бўлиб, улар ҳар куни аҳоли билан ишлаб, одамларга давлат томонидан яратилаётган молиявий имкониятларни етказиши қолаверса, тадбиркорлик ва деҳқончиликка ўргатиш орқали камбағалликдан чиқишига хизмат қилувчи инсондир.

Аҳолининг энг қуйи қатламлари билан ишлаб, уларнинг муаммолари ечими билан шуғулланувчи ва ўша ерда давлат сиёсатини юрғизадиган сиёсат олиб бориш кўзда тутилган. Биргина Хитой давлатини мисол қиладиган бўлсак, аҳолининг камбағалликда ҳаёт кечирувчи қатламини камбағалликдан олиб чиқиш учун ҳоким ёрдамчилари тизимига ўхшаш тизим жорий қилинди. Ушбу тизим доирасида 3 млндан ортиқ юқори малакали кадрлар аҳолининг қуйи қатламлари орасида юриб, дардини ўрганиб мамлакатнинг қарийб 800 млн аҳолисини камбағаллик чегарасидан олиб чиқди. Бундай мисоллар жумласига Кореядаги “Янги қишлоқ” дастурини ҳам келтириш мумкин”, дейди Марказ раҳбари.

Ҳозирги кунда ўз фаолиятини бошлаган 9309 нафар ҳоким ёрдамчилари фаолиятини назорат қилувчи махсус агентлик ташкил этилди.

Ҳоким ёрдамчилари ҳар бир хонадонни индивидуал ёндашган ҳолда ўрганади ва ушбу ўрганишларни олиб бориш учун тоифаларга ажратилган сўровномалар тузилган. Аҳолининг шароит ва муаммоларидан келиб чиқиб сўровномалар фарқ қилади.

Ҳозирги кунда мамлакатимизда истиқомат қилаётган 30 фоиз уй хўжаликлари ижтимоий ҳимояга муҳтож ҳисобланади. Ушбу оилаларнинг ҳар бирига индивидуал тарзда ёндашилиб, “йўл харита” лари ишлаб чиқилади.

Мисол учун, бир хўжалик доирасида оладиган бўлсак, ушбу оиланинг муаммоси аниқлангач, муаммони ечишда иштироки зарур бўлган муассасалар масалан, тижорат банклари, вазирликлар, ҳокимликлар нима иш қилиши кераклиги аниқ кўрсатилган йўл харитаси тузулади.

Республика миқёсида оладиган бўлсак, 10 трлн. сўм кредитларга ва 2,5 трлн. сўм маблағ субсидияларга ажратилди. Бундан билишимиз мумкинки, ҳар бир маҳаллага ушбу тизимни молиялаштириш учун 1,3 млрд. сўм маблағ ажратилади. Қолаверса, баъзи бир вилоятларда солиқлардан ортган маблағларни ҳоким ёрдамчиларига тақсимлашмоқда.

Биргина Жиззах вилоятининг Шароф Рашидов туманида фаолиятини бошлаган ҳоким ёрдамчисининг таъкидлашича ҳозирда унинг тассаруфида 2 млрд. маблағи бор.

Мамлакатимиз раҳбари томонидан ҳар бир ҳокимга ҳар куни камида битта янги иш ўрни яратиш вазифаси белгилаб берилди. Бир ойда камида 30 та янги иш ўрни яратилади. Буни амалга оширишда тадбиркорлик билан ҳуғулланиш нияти мавжуд бўлган аҳолига тадбиркорликни амалга ошириш учун зарур бўлган маълумотлар берилади ва йўл-йўриқ кўрсатилади. Тадбиркорлик билан шуғулланиш нияти мавжуд бўлмаган аҳоли учун ўша маҳаллада амалга оширилаётган инвестиция лойиҳалари ёки янги очилаётган ташкилотлардан уларга иш ўрни топиб бериши зарур ҳисобланади. Қисқача қилиб айтганда бандликни оширишга катта эътибор қаратилган.

Ушбу ислоҳотларнинг самарали натижасини баҳолаш учун бир қанча кўрсаткичлар тизими ишлаб чиқилмоқда, мисол учун, ҳар бир маҳаллада аҳоли жон бошига тўғри келувчи даромад даражаси ёки ҳар бир маҳаллада тадбиркорлар сони, ўзлаштирилаётган томорқалар ҳажми ва ҳокозоларни қамраб олувчи кўрсаткичлар тизими яратилмоқда ва жорий йилнинг февраль ойидан бошлаб ушбу кўрсаткичлар асосида баҳолаш тизими жорий қилинади. Баҳолаш деганда ҳар бир ҳоким ёрдамчисининг фаолияти шу кўрсаткичлар тизими орқали баҳоланиб рағбатлантирилади ёки чора кўрилади” дейди Обид Ҳакимов.

Мақолани улашинг

Ўхшаш янгиликлар