Fevral oyida inflyasiya 0,6 foizni tashkil etdi
Iste’mol tovarlari va nooziq-ovqat mahsulotlari narxi o‘rtacha 0,6 foizga, xizmatlar 0,8 foizga qimmatlashgan.
O‘zbekistonda 2021 yilning fevral oyida iste’mol tovarlari va nooziq-ovqat mahsulotlari narxi o‘rtacha 0,6 foizga qimmatlashdi. Bu haqda Davlat statistika qo‘mitasi xabar berdi.
Oziq-ovqat mahsulotlari va spirtsiz ichimliklar asosiy guruhlari ichida mevalar va yong‘oqlar (1,7 foiz), sabzavotlar, ildizmevalilar, plantaynlar (sabzavot bananlar), yog‘lar va moylar (1,4 foiz), shuningdek, dukkaklilar (0,8 foiz) oy davomida sezilarli darajada oshgan.
2020 yilning fevralida ushbu bo‘limda mevalar va yong‘oqlar (4,3 foiz) boshqalarga nisbatan yuqoriroq qimmatlashgan bo‘lsa, sut, sut mahsulotlari va tuxum (-0,1 foiz) narxlarida arzonlashish qayd etilgan.
O‘tgan oy davomida xizmatlar 0,8 foizga qimmatlashgan. Bu o‘tgan yilning fevral oyiga nisbatan 0,5 foiz bandga yuqori. 2019 yilning fevral oyida xizmatlar narxlarining oshishi joriy yildagi kabi 0,8 foizni tashkil etgan.
Bundan tashqari, yil boshidan turar joylarga xizmat ko‘rsatish uchun materiallar 1,5 foizga (2020 yil fevraliga nisbatan 12,1 foiz), turar joylarga xizmat ko‘rsatish va ta’mirlash bo‘yicha xizmatlar 1,0 foiz (15,7 foiz), sovuq suv va kanalizatsiya uchun to‘lovlar 1,6 barobarga (1,9 barobar), ko‘p xonadonli uylarga xizmat ko‘rsatish 1,3 foizga (3,2 foiz), chiqindilarni to‘plash uchun to‘lovlar 0,7 foizga (2,8 foiz) oshgan.
Izoh qoldirish