Ta’lim almashinuvi va o‘qituvchilarning malakasini oshirish
Hamkorlikning muhim yo‘nalishlaridan biri talabalar almashinuvi bo‘lib, bu ta’lim dasturlari ufqlarini kengaytiradi va xalqaro aloqalarni mustahkamlaydi. NITU MISIS filiali talabalari Xitoy ta’lim tizimi, shuningdek, ilg‘or ilmiy va texnik ishlanmalar bilan tanishib, Uxan universitetida tahsil olishlari mumkin bo‘ladi. O‘z navbatida, Uxan universiteti talabalari O‘zbekistonda bilimlarini kengaytirib, Olmaliqda o‘qish uchun noyob imkoniyatga ega bo‘ladilar.
Xuddi shunday muhim jihat - o‘qituvchilarning malakasini oshirish. Shartnomaga ko‘ra, har ikki tomon o‘qituvchilari o‘qitishning yangi uslublarini joriy etish, o‘zaro tajriba almashish, o‘quv-uslubiy materiallarni birgalikda ishlab chiqish imkoniyatlarini ochib beradigan almashinuv dasturlarida ishtirok etishlari mumkin.
Qo‘shma ilmiy tadqiqotlar
Universitetlar o‘rtasidagi ilmiy hamkorlik qo‘shma ilmiy loyihalarni amalga oshirish uchun keng imkoniyatlar yaratmoqda. Uxan Fan va Texnologiya Universiteti muhandislik, materialshunoslik va yangi texnologiyalar sohasidagi yutuqlari bilan mashhur, NITU MISIS esa metallurgiya, nanomateriallar va yuqori texnologiyali tadqiqotlar sohasida yetakchi sifatida o‘zini namoyon qildi. Ikkala tomonning birgalikdagi sa’y-harakatlari sanoatda ham, akademik tadqiqotlarda ham qo‘llanilishi mumkin bo‘lgan innovatsion yechimlarni yaratishga yordam beradi.
Qo‘shma laboratoriyalar
Zamonaviy asbob-uskunalar bilan jihozlangan qo‘shma laboratoriyalar tashkil etishga alohida e’tibor qaratilmoqda. Bu laboratoriyalar nafaqat o‘quv maqsadiga xizmat qiladi, balki jahon andozalari darajasida ilmiy tadqiqotlar olib borishning muhim markazlariga aylanadi. Ular har ikki mamlakatda yuqori texnologiyali sanoatni rivojlantirishga katta ta’sir ko‘rsatadigan innovatsion ilmiy loyihalarni ishlab chiqadilar.
Kelajak istiqbollari
NITU MISISning Olmaliqdagi filiali va Uxan Fan va Texnologiya universiteti o‘rtasidagi hamkorlik ta’lim va ilmiy loyihalar uchun yangi ufqlarni ochadi. O‘zaro bilim, ilg‘or texnologiyalar va tajriba almashish nafaqat ta’lim sifatini oshirish, balki, ikki mamlakatning yuqori texnologiyali sanoatiga sezilarli ta’sir ko‘rsatishi mumkin bo‘lgan ilmiy tadqiqotlarni rivojlantirishga ham xizmat qiladi.
Bu hamkorlik ta’lim va ilm-fan sohasidagi O‘zbekiston-Xitoy munosabatlarini mustahkamlash, madaniyatlar va texnologiyalar chorrahasida faoliyat yuritadigan olimlar, muhandislar va mutaxassislarning kelajak avlodlari uchun yangi istiqbollarni ochish, global muammolarga yechim yaratishda muhim bosqich bo‘ladi.
E’tirof: Farxodbek Yarqulovich Umarovga Uxan Fan va Texnologiya universiteti professori faxriy unvoni berildi
NITU MISISning Olmaliq shahridagi filiali direktori, texnika fanlari doktori Farxodbek Yarqulovich Umarovga Uxan Fan va Texnologiya Universiteti (XXR) professori faxriy unvoni berildi. Bu yuksak e’tirof uning xalqaro ilmiy-ta’lim hamkorligini rivojlantirishga qo‘shgan salmoqli hissasi hamda muhandislik-texnika fanlari yo‘nalishida o‘quv va ilmiy izlanishlar olib borishdagi faoliyati natijasidir.
Professor unvoni Farxodbek Yarqulovichga fan, innovatsiyalar va yuqori malakali mutaxassislar tayyorlash sohasidagi faol faoliyati uchun berildi. Umarov F.Ya. NITU MISIS filiali va Uxan Fan va Texnologiya universiteti o‘rtasidagi hamkorlikni mustahkamlashda, shuningdek, qo‘shma ilmiy loyihalar va ta’lim dasturlarini tashkil etishda muhim rol o‘ynadi.
Izoh qoldirish