Samarqand viloyatining 2022 yil yanvar-sentyabr oylaridagi iste’mol narxlari indeksi va inflyasiya darajasi

Kuzatilayotgan inflyasion bosim ta’sirida qo‘shni davlatlarda joriy yilning yanvar-avgust oylarida:

• un va don mahsulotlarining narxi 1,2 barobargacha (Rossiya Federatsiyasida 11%, Qozog‘iston Respublikasida 24%, Qirg‘iziston Respublikasida 21%);
• o‘simlik yog‘i narxi 11%gacha (Rossiyada – 11%, Qozog‘istonda – 11% va Qirg‘izistonda – 9%);
• piyoz mahsuloti narxi 1,8 barobargacha (Rossiyada - 33%, Qozog‘istonda - 47%, Qirg‘izistonda - 83%);
• go‘sht narxi qariyb 15%gacha (Rossiyada – 13%, Qozog‘istonda – 15%, Qirg‘izistonda – 10%)ga oshganligi ko‘zatiladi.

Umuman olganda, oldingi yillardagi ko‘rsatkichlar, shu jumladan, mavsumiy omillar, shuningdek, dunyodagi joriy vaziyat va ichki bozorda kutilayotgan tendensiyalar ichki iste’mol bozorlari indeksiga ta’sir o‘tkazmoqda.

Jumladan, joriy yilning yanvar-sentyabr oylarida (o‘tgan yilning dekabr oyiga nisbatan) Samarqand viloyati bo‘yicha o‘rtacha inflyasiya ko‘rsatkichi 8,1%ni (respublika ko‘rsatkichi 8,1%) tashkil etdi. Shundan,

• oziq-ovqat mahsulotlari 10,1% (respublika ko‘rsatkichi 10,0% yoki 0,1 punkt ko‘p);
• nooziq-ovqat mahsulotlari 8,0% (respublika ko‘rsatkichi 7,9% yoki 0,1 punkt ko‘p);
• xizmatlar ko‘rsatish 4,7% (respublika ko‘rsatkichi 4,8% yoki 0,1 punkt kam)ni tashkil etdi.

Bunda eng yuqori o‘sish restoran va mehmonxonalar xizmatlari 19,6%ga, dam olish, sport va madaniyat xizmatlari 14,6%ga, maishiy tovarlar va xizmatlar, ijtimoiy va turli tovarlar hamda boshqa xizmatlar 11,3%ga, sog‘liqni saqlash xizmatlari 9,8%ga, uy ruzg‘or asboblari, maishiy texnika va turar joylarga kundalik xizmatlar ko‘rsatish 8,2%ga oshgan.

Shu bilan birga, o‘tgan davrda viloyatda ayrim oziq-ovqat mahsulotlarning narxi sezilarli darajada oshgan. Jumladan:

• piyoz – 88,2% (respublikada o‘rtacha 74,9%)ga;
• shakar – 49,9% (respublikada - 53,8%)ga;
• bug‘doy uni – 41,7% (respublikada - 40,7%)ga;
• buxanka noni – 39,6% (respublikada - 51,0%)ga;
• barcha navdagi guruch – 17,4% (respublikada – 19,2%)ga;
• o‘simlik yog‘i – 13,7% (respublikada - 13,2%)ga;
• paxta yog‘i – 11,3% (respublikada - 11,0%)ga.

O‘z navbatida, ushbu davrda o‘tgan yilning dekabriga nisbatan kartoshka narxi 10,3%ga arzonlashganligini ko‘rishimiz mumkin.

Bundan tashqari, shu yilning sentyabr oyida o‘tgan oyga nisbatan iste’mol narxlari indeksi 1,0%ga, shundan oziq-ovqat mahsulotlari 1,4%ga, nooziq-ovqat mahsulotlari 0,7%ga va xizmatlar 0,8%ga o‘sishi ko‘zatilgan.

Jumladan, tuxum narxi 2,8%ga, tovuq go‘shti 2,7%ga, kartoshka mahsuloti 2,1%ga va quy go‘shti 1,5%ga yuqori o‘sish darajasi ko‘zatilgan bo‘lsa, piyoz narxi 3,0%ga va sabzi 1,0%ga arzonlashgan.

Ta’kidlash joiz, prognoz parametrlariga ko‘ra joriy yil yakuniga qadar inflyasiya darajasi 12,0%gacha bo‘lishi ko‘zda tutilmoqda.

Ushbu inflyasion vaziyatdan kelib chiqib, mahalliy hokimlik organlari aholi ehtiyoji uchun yetishmaydigan asosiy iste’mol tovarlari, ayniqsa kartoshka, piyoz, o‘simlik va paxta yog‘i, shakar va guruch mahsulotlari, zarur hollarda xususiy sektorni jalb qilgan holda muqobil bozorlardan import qilish orqali kafolatli ta’minlash hamda inflyasiyani ushlab turish yuzasidan zaruriy choralarni ko‘rish lozim hisoblanadi.