Ўзбекистон халқаро захиралари таркибида олтин ҳажми 8,7 тоннага ошди

Ўзбекистон халқаро захиралари таркибида олтин ҳажми 8,7 тоннага ошди

Ўзбекистон Республикаси Марказий банки томонидан 2022 йил 1 август ҳолатига халқаро захиралари статистикаси эълон қилинди. Ушбу статистика маълумотлари таҳлили шуни кўрсатмоқдаки, Ўзбекистон халқаро захиралари таркибида соф олтин июнь ойига нисбатан 8,7 тоннага ошди ва бу умумий захиралар ҳажмининг 493 млн долларга кўпайишига олиб келди.

Лекин, мазкур даврда жаҳон бозорида 1 унция олтин нархининг 1813,6 доллардан 1758,9 долларга тушиши туфайли соф олтин қолдиғини қайта ҳисоб-китоб қилиниши халқаро захиралар ҳажмини 635 млн доллар миқдорида камайишига сабаб бўлди.

1-расм. Ўзбекистон халқаро захиралари ўзгариши

млн. АҚШ доллари

Манба: Ўзбекистон Марказий банки маълумотлари асосида ҳисоб-китоблар

Хорижий валютадаги захира активлар қолдиғи эса 830,4 млн долларга камайди. Ушбу омиллар халқаро захиралар умумий ҳажмининг июнь ойига нисбатан 2,7%га (35,6 млрд доллардан 34,6 млрд долларга) камайишига сабаб бўлди.

Таъкидлаб ўтиш керакки, глобал геосиёсий вазиятлар туфайли олтин нархининг ўзгариши мамлакатлар олтин-валюта захираларининг ўзгариб туришига сабаб бўлади. Глобал иқтисодиётда инфляция даражаси, ғарб давлатларида рецессия рискининг ошиб бориши билан боғлиқ ноаниқликларнинг сақланиб қолиши шароитида олтин нархининг яна ошиши мамлакатимиз олтин-валюта захирасининг ошишига туртки бўлади.

Сўнгги йилларда Ўзбекистонда олтин-валюта заҳиралари ҳажми сезиларли даражада ошди. Халқаро меъёрлар бўйича мамлакатимиз халқаро заҳираларининг етарли даражаси иқтисодиётимизнинг ташқи шокларга мослашувчанлигини ошириб, макроиқтисодий барқарорликни таъминлашга ёрдам бермоқда.

Иқтисодий тадқиқотлар ва ислоҳотлар маркази
Жамоатчилик билан алоқлар бўлими
Мақолани улашинг

Ўхшаш янгиликлар