Шўртан газ кимё мажмуасининг ишлаб чиқариш қувватлари инвестиция лойиҳасини амалга ошириш учун 2019 йилда имзоланган ва ҳозирги кунда ўзлаштирилиши тўхтаб қолган 300.0 млн доллар кредит линиясининг ўзлаштирилмай қолган 152.0 млн доллар миқдоридаги кредит маблағларини шу йилнинг охиригача ўзлаштиришга келишиб олинди. Бу ҳақда “Ўзбекнефтгаз” АЖ матбуот хизмати хабар қилди.
Хабарда таъкидланишича, “Ўзбекнефтгаз” АЖ Бошқаруви раиси Меҳриддин Абдуллаевнинг Россия Федерациясига қилган ташрифи доирасида, йирик молиявий ҳамкор “Газпромбанк” АЖ раҳбарияти билан музокаралар олиб борилган.
Инвестиция лойиҳаси амалга оширилиши натижасида “GTL” заводидан олинадиган йилига 430 минг тонна синтетик нафтани қайта ишлаш орқали полиэтилен ишлаб чиқариш ҳажмини йилига қўшимча 280 минг т (434,26 млн доллар миқдорида), полипропилен ҳажмини йилига қўшимча 100 минг т (170,21 млн доллар миқдорида), пиролиз дистилляти ва мой ҳажмларини йилига қўшимча 50 минг (7,88 млн доллар миқдорида) ошириш (жами 612,35 млн доллар миқдорида) режалаштирилган.
Лойиҳанинг умумий қиймати 1784.0 млн долларни ташкил этади ва қўшимча 800 та иш ўринлари яратиш режалаштирилган.
Изоҳ қолдириш