O‘zbekistonda davlat organlari va hududlar uchun korrupsiya hamda yashirin iqtisodiyot reytingi ishga tushiriladi

O‘zbekistonda davlat organlari va hududlar uchun korrupsiya hamda yashirin iqtisodiyot reytingi ishga tushiriladi

O‘zbekiston Respublikasi Prezidentining "O‘zbekiston Respublikasida korrupsiyaga qarshi kurashish tizimini yanada takomillashtirish bo‘yicha qo‘shimcha chora-tadbirlari to‘g‘risida"gi farmoni ijrosini ta’minlash maqsadida Iqtisodiy tadqiqotlar va islohotlar markazi (Markaz) Korrupsiyaga qarshi kurashish agentligi bilan birgalikda davlat organlari, korxonalar va hududlar uchun korrupsiya va yashirin iqtisodiyot reytingini (keyingi o‘rinlarda reyting) ishlab hisoblash metodologiyasini chiqdi.

Reyting mamlakatda korrupsiya va yashirin iqtisodiyotga qarshi kurashish sohasida amalga oshirilayotgan o‘zgarishlarni va islohotlarni ob’yektiv baholash maqsadida yuritilmoqda.

2021 yildan boshlab barcha rahbarlarning shaxsiy javobgarligi asosida baholash reyting natijalarini har yili e’lon qilish yo‘lga qo‘yiladi.

Reyting doirasida, xususan, respublikaning barcha hududlarda aholi, tadbirkorlar va davlat xizmatchilari o‘rtasida anonim so‘rov o‘tkaziladi.

Markaz eksperti Baxtishod Hamidov ishlab chiqilgan reytingning dolzarbligi va metodologiyasini quyidagicha izohladi:

- O‘zbekiston uchun shu paytgacha korrupsiya muammolarini aniqlash bo‘yicha ko‘plab tadqiqotlar o‘tkazildi. Biroq, ushbu baholar asosan respublika darajasida taqdim etiladi. Sektorlar yoki hududlar kesimida o‘tkazilgan baholashlar bir martalik bo‘lib, muammolarni o‘z vaqtida aniqlash imkonini bermaydi.

Islohotlar jarayoni ayrim sektorlarda va hududlarda korrupsiya darajasini aniqlashni talab qiladi, chunki korrupsiya ko‘rilayotgan choralar samarasizligining asosiy omili hisoblanadi. Shuning uchun, keng qamrovli islohotlarni amalga oshirishdan oldin, quyidagi muhim savollarga javob topish kerak: sektor/hudud kesimida korrupsiya muammosi qanchalik jiddiy?

Jahon amaliyotida ushbu savollarga aniqroq javob olish uchun korrupsiya darajasini baholashning ko‘plab usullari qo‘llaniladi. Ko‘p usullar korrupsiya muammosining yopiqligi va murakkabligi bilan bog‘liq. Shu bilan birga, turli xil o‘lchov usullaridan foydalanish yanada keng ko‘lamli natijalarga erishish imkonini beradi, chunki qamrovning kengligi muammolarni har tomonlama o‘rganishga yordam beradi.

Shu bilan birga, usullarning samarali kombinatsiyasi aniq sektorlarda va hududlarda islohotlar jarayonini to‘g‘ri shakllantirish, amalga oshirish, monitoring qilish va baholashga yordam beradi.

O‘tkir Nomozboyev, Korrupsiyaga qarshi kurashish agentligi mas’ul xodimi:

Bugungi kunda mamlakatda biznesga qo‘shimcha qulayliklar yaratish orqali yashirin iqtisodiyot darajasini kamaytirish bo‘yicha kompleks choralar ko‘rilmoqda. Xususan, valyuta bozori erkinlashtirildi, yangi soliq tizimi joriy etildi, 100 ga yaqin ruxsat berish va litsenziyalash qoidalari qisqartirildi. Buning natijasida oxirgi 5 yilda sanoatda norasmiy sektor ulushi 20 foizdan 6 foizga tushdi.

O‘zbekistonda yashirin iqtisodiyotni yaqin 5 yilda 2 barobarga qisqartirish bo‘yicha vazifalar belgilandi. Buning uchun, albatta, aniq chora-tadbirlar zarur. Ana shunday mexanizmlardan biri bu — rahbar kadrlarning korrupsiya va yashirin iqtisodiyotga qarshi kurashish bo‘yicha shaxsiy mas’uliyatini oshirish hisoblanadi.

Shu maqsadda kelgusi yildan boshlab Korrupsiyaga qarshi kurashish agentligi hamda Iqtisodiy tadqiqotlar va islohotlar markazi tomonidan mustaqil jamoat tashkilotlarini jalb qilgan holda hududlar va barcha davlat organlaridagi yashirin iqtisodiyot va korrupsiyaga qarshi kurashish bo‘yicha olib borilayotgan ishlar muntazam o‘rganib boriladi. Yakunda biz qaysi davlat organi, korxona va hududdagi holat qandayligini keng jamoatchilikka e’lon qilishimiz mumkin bo‘ladi.

Iqtisodiy tadqiqotlar va islohotlar markazi

jamoatchilik bilan aloqalar xizmati

Maqolani ulashing

O'xshash yangiliklar