Qoraqalpog‘iston Respublikasining 2022 yil I choragi yakunlari bo‘yicha asosiy makroiqtisodiy ko‘rsatkichlari

Qoraqalpog‘iston Respublikasining 2022 yil I choragi yakunlari bo‘yicha asosiy makroiqtisodiy ko‘rsatkichlari

2022 yil I choragida Qoraqalpog‘iston Respublikasi yalpi hududiy mahsuloti 2021 yilning mos davriga nisbatan 3,7 foizga o‘sdi va 5,7 trln. so‘mni tashkil etdi.

Aholi jon boshiga yalpi hududiy mahsulot hajmi esa 2,9 mln. so‘mni tashkil etib, 2021 yilning mos davriga nisbatan 2,3 foizga o‘sdi.

2022 yilning I choragida hududda sanoat mahsulotlari ishlab chiqarish hajmi 4,3 trln. so‘mni tashkil etib, o‘tgan yilning mos davriga nisbatan 1,8 foizga o‘sdi.

Shuningdek, 2022 yilning I choragida qishloq xo‘jaligida 2021 yilning mos davriga nisbatan 1,2 foizga o‘sish kuzatildi va qishloq xo‘jaligi mahsulotlarini ishlab chiqarish hajmi 1,1 trln. so‘mni tashkil etdi.

Shu bilan birga, xizmatlar sohasida sezilarli o‘sish sur’atlari kuzatildi va bu ko‘rsatkich 2021 yilning mos davriga nisbatan 118,3 foizni, ko‘rsatilgan xizmatlar hajmi esa 2,2 trln. so‘mni tashkil etdi. Jumaladan, ko‘rsatilgan xizmatlar hajmining eng yuqori o‘sish sur’ati Qo‘ng‘irot tumanida kuzatilib, bu ko‘rsatkich 80,2 foizni tashkil etganini alohida ta’kidlash lozim. Qo‘ng‘irot tumanidan keyingi o‘rinlar Mo‘ynoq (16,1 foiz), Kegeyli (14,6 foiz), Chimboy (13,3 foiz), Taxtako‘pir (13,0 foiz), Qorao‘zak (12,8 foiz) tumanlari va Nukus shahriga (11,4 foiz) to‘g‘ri kelmoqda.

Hududda ko‘rsatilgan xizmatlarning 41,5 foizi Nukus shahri hissasiga to‘g‘ri keladi. Xizmatlar sohasida eng katta ulush bo‘yicha keyingi o‘rinlarni Qo‘ng‘irot (16,5%), To‘rtko‘l (8,5%), Beruniy (5,4%) va Amudaryo (5,1%) tumanlari egalladi.

Bundan tashqari, 2021 yilning mos davriga nisbatan chakana savdo aylanmasi 11,0 foizga oshib, 2,0 trln. so‘mni tashkil etdi.

Tahlil qilinayotgan davr mobaynida, asosiy kapitalga yo‘naltirilgan investitsiyalar 5,7%ga o‘sdi va ular hajmi 1,6 trln. so‘mni tashkil etdi.

Ammo, iste’mol tovarlari ishlab chiqarish hajmi va yangi tashkil etilayotgan kichik biznes sub’yektlari sonida qisqarish kuzatildi. Joriy yilning yanvar-mart oylarida hududda 565,4 mlrd. so‘mlik iste’mol tovarlari ishlab chiqarildi. Shuningdek, 1028 ta kichik biznes sub’yekti tashkil etildi. Ushbu ko‘rsatkichlarning pasayishi mos ravishda 5,7% va 19,1%ni tashkil etdi.

Tahlil qilinayotgan davrda Qoraqalpog‘iston Respublikasining tashqi savdo aylanmasi 140,4 mln. AQSh dollarini tashkil etdi. Bu esa o‘tgan yilning mos davriga nisbatan 9,2 foizga kam. Hududda savdo balansida 31 mln. dollarlik ijobiy saldo qayd etilishiga qaramasdan, eksport hajmi o‘tgan yilning mos davriga nisbatan 18,1 foizga kamaydi va 85,7 mln. dollarni tashkil etdi. Shu bilan birga, import hajmi 54,7 mln. dollarni tashkil etdi va 9,6 foizga oshdi.


Maqolani ulashing

O'xshash yangiliklar