Қорақалпоғистон Республикасининг 2022 йил I чораги якунлари бўйича асосий макроиқтисодий кўрсаткичлари

Қорақалпоғистон Республикасининг 2022 йил I чораги якунлари бўйича асосий макроиқтисодий кўрсаткичлари

2022 йил I чорагида Қорақалпоғистон Республикаси ялпи ҳудудий маҳсулоти 2021 йилнинг мос даврига нисбатан 3,7 фоизга ўсди ва 5,7 трлн. сўмни ташкил этди.

Аҳоли жон бошига ялпи ҳудудий маҳсулот ҳажми эса 2,9 млн. сўмни ташкил этиб, 2021 йилнинг мос даврига нисбатан 2,3 фоизга ўсди.

2022 йилнинг I чорагида ҳудудда саноат маҳсулотлари ишлаб чиқариш ҳажми 4,3 трлн. сўмни ташкил этиб, ўтган йилнинг мос даврига нисбатан 1,8 фоизга ўсди.

Шунингдек, 2022 йилнинг I чорагида қишлоқ хўжалигида 2021 йилнинг мос даврига нисбатан 1,2 фоизга ўсиш кузатилди ва қишлоқ хўжалиги маҳсулотларини ишлаб чиқариш ҳажми 1,1 трлн. сўмни ташкил этди.

Шу билан бирга, хизматлар соҳасида сезиларли ўсиш суръатлари кузатилди ва бу кўрсаткич 2021 йилнинг мос даврига нисбатан 118,3 фоизни, кўрсатилган хизматлар ҳажми эса 2,2 трлн. сўмни ташкил этди. Жумаладан, кўрсатилган хизматлар ҳажмининг энг юқори ўсиш суръати Қўнғирот туманида кузатилиб, бу кўрсаткич 80,2 фоизни ташкил этганини алоҳида таъкидлаш лозим. Қўнғирот туманидан кейинги ўринлар Мўйноқ (16,1 фоиз), Кегейли (14,6 фоиз), Чимбой (13,3 фоиз), Тахтакўпир (13,0 фоиз), Қораўзак (12,8 фоиз) туманлари ва Нукус шаҳрига (11,4 фоиз) тўғри келмоқда.

Ҳудудда кўрсатилган хизматларнинг 41,5 фоизи Нукус шаҳри ҳиссасига тўғри келади. Хизматлар соҳасида энг катта улуш бўйича кейинги ўринларни Қўнғирот (16,5%), Тўрткўл (8,5%), Беруний (5,4%) ва Амударё (5,1%) туманлари эгаллади.

Бундан ташқари, 2021 йилнинг мос даврига нисбатан чакана савдо айланмаси 11,0 фоизга ошиб, 2,0 трлн. сўмни ташкил этди.

Таҳлил қилинаётган давр мобайнида, асосий капиталга йўналтирилган инвестициялар 5,7%га ўсди ва улар ҳажми 1,6 трлн. сўмни ташкил этди.

Аммо, истеъмол товарлари ишлаб чиқариш ҳажми ва янги ташкил этилаётган кичик бизнес субъектлари сонида қисқариш кузатилди. Жорий йилнинг январь-март ойларида ҳудудда 565,4 млрд. сўмлик истеъмол товарлари ишлаб чиқарилди. Шунингдек, 1028 та кичик бизнес субъекти ташкил этилди. Ушбу кўрсаткичларнинг пасайиши мос равишда 5,7% ва 19,1%ни ташкил этди.

Таҳлил қилинаётган даврда Қорақалпоғистон Республикасининг ташқи савдо айланмаси 140,4 млн. АҚШ долларини ташкил этди. Бу эса ўтган йилнинг мос даврига нисбатан 9,2 фоизга кам. Ҳудудда савдо балансида 31 млн. долларлик ижобий салдо қайд этилишига қарамасдан, экспорт ҳажми ўтган йилнинг мос даврига нисбатан 18,1 фоизга камайди ва 85,7 млн. долларни ташкил этди. Шу билан бирга, импорт ҳажми 54,7 млн. долларни ташкил этди ва 9,6 фоизга ошди.


Мақолани улашинг

Ўхшаш янгиликлар