Qoraqalpog‘iston Respublikasining 2022 yil uchun jami byudjet daromadlari 3 trln. 874,2 mlrd. so‘m miqdorida rejalashtirilgan (+Infografika)

Qoraqalpog‘iston Respublikasining 2022 yil uchun jami byudjet daromadlari 3 trln. 874,2 mlrd. so‘m miqdorida rejalashtirilgan (+Infografika)

Qoraqalpog‘iston Respublikasining 2022 yil uchun jami byudjet daromadlari 3 trln. 874,2 mlrd. so‘m miqdorida rejalashtirilgan bo‘lib, ushbu daromadlarning 61 foizi (2 trln. 356,2 mlrd. so‘m) Qoraqalpog‘iston Ryespublikasi respublika byudjeti daromadlari va 39 foizi (1 trln. 518,0 mlrd. so‘m) esa O‘zbekiston Respublikasi respublika byudjetidan ajratiladigan tartibga soluvchi byudjetlararo transfertlardan iborat.

2022 yilda yalpi hududiy mahsulot 27,6 trln. so‘m bo‘lishi reja qilinib, 2021 yilga nisbatan 5,2 foizga o‘sishi ko‘rsatib o‘tilgan. YaHM 2023 yilda 6 foizga va 2024 yilda 6,4 foizga o‘sishi prognoz qilingan.

Qoraqalpog‘iston Respublikasining asosiy makroiqtisodiy ko‘rsatkichlari hisoblangan sanoat sohasining o‘sish sur’ati 2022 yilda 105,2%, qishloq xo‘jaligi sohasining o‘sish sur’ati 103,2% hamda chakana tovar aylanmasining o‘sish sur’ati 111% bo‘lishi rejalashtirilgan.

Qoraqalpog‘iston Respublikasining daromad qismi jismoniy shaxslardan olinadigan daromad solig‘i, yuridik shaxslardan olinadigan daromad solig‘i, jismoniy va yuridik shaxslardan olinadigan yer solig‘i, yig‘imlar, alkogol mahsuloti va benzin, dizel yoqilg‘isi va gaz realizatsiyasidan aksiz solig‘idan tegishli ravishda o‘tkazib beriladigan daromadlar hisobidan shakllanadi.

Eng ko‘p mablag‘ ajratiladigan sohalar:

- sog‘liqni saqlash sohasi (tashkilot va sohalar uchun taqsimlangan mablag‘larning 32,9%i);

- kam ta’minlangan va ko‘p bolali oilalarga moddiy yordam pullari (15,4%);

- xalq ta’limi sohasi (14,4%);

- investitsiya xarajatlari (8,2%);

- davlat hokimiyati organlari (6,3%);

- obodonlashtirish (5,8%);

- suv xo‘jaligi (5,1%), OTM va maktablar rekonstruksiyasi (4,2%).

Jismoniy va yuridik shaxslar bo‘yicha (dehqon xo‘jaligini yuritish uchun berilgan qishloq xo‘jaligiga mo‘ljallangan yerlardan tashqari) mutloq miqdorda 1 kv. metr uchun belgilangan bazaviy soliq stavkalariga nisbatan kiritilayotgan kamaytiruvchi va oshiruvchi koeffitsiyentlar shahar va tumanlar kesimida ham tasdiqlangan. Jumladan, Nukus shahri va Xo‘jayli, Taxiatosh, Amudaryo, Beruniy, Ellikqal’a, To‘rtko‘l tumanlarida 1 kv. metr uchun jismoniy shaxslarga nisbatan o‘rtacha 269 so‘m va yuridik shaxslarga nisbatan o‘rtacha 2898 so‘m qiymatlarida 1,1 koeffitsiyent belgilangan. Bo‘zatov, Qonliko‘l, Qorao‘zak, Kegeyli, Qo‘ng‘irot, Mo‘ynoq, Nukus, Taxtako‘pir, Chimboy, Shumanay tumanlarida esa 1 koeffitsiyent belgilangan.

Qishloq xo‘jaligiga mo‘ljallanmagan yerlarning bazaviy soliq stavkasi yuridik shaxslar bo‘yicha Nukus shahri, Xo‘jayli, Taxiatosh, Amudaryo, Beruniy, Ellikqal’a, To‘rtko‘l tumanlari uchun 1 ga yer maydoniga 30,8 mln. so‘m (1,1 koeffitsiyent), Bo‘zatov, Qonliko‘l, Qorao‘zak, Kegeyli, Qo‘ng‘irot, Mo‘ynoq, Nukus, Taxtako‘pir, Chimboy, Shumanay tumanlari uchun 1 ga yer maydoni qiymati 28 mln. so‘m (1,0 koeffitsiyent) etib belgilangan.

Qishloq va mahalla fuqarolar yig‘inlarida iqtisodiy rivojlanganlik darajasiga qarab, 0,7 dan 3,0 gacha kamaytiruvchi va oshiruvchi koeffitsiyentlari belgilanadi.

Salamat Begmanov

Iqtisodiy tadqiqotlar va islohotlar markazi Qoraqalpog‘iston Respublikasi filialining bosh ilmiy xodimi

Yusup Jumabayev

Iqtisodiy tadqiqotlar va islohotlar markazi Qoraqalpog‘iston Respublikasi filialining yetakchi ilmiy xodimi

Maqolani ulashing

O'xshash yangiliklar