Қорақалпоғистон Республикасининг 2022 йил учун жами бюджет даромадлари 3 трлн. 874,2 млрд. сўм миқдорида режалаштирилган (+Инфографика)

Қорақалпоғистон Республикасининг 2022 йил учун жами бюджет даромадлари 3 трлн. 874,2 млрд. сўм миқдорида режалаштирилган (+Инфографика)

Қорақалпоғистон Республикасининг 2022 йил учун жами бюджет даромадлари 3 трлн. 874,2 млрд. сўм миқдорида режалаштирилган бўлиб, ушбу даромадларнинг 61 фоизи (2 трлн. 356,2 млрд. сўм) Қорақалпоғистон Республикаси республика бюджети даромадлари ва 39 фоизи (1 трлн. 518,0 млрд. сўм) эса Ўзбекистон Республикаси республика бюджетидан ажратиладиган тартибга солувчи бюджетлараро трансфертлардан иборат.

2022 йилда ялпи ҳудудий маҳсулот 27,6 трлн. сўм бўлиши режа қилиниб, 2021 йилга нисбатан 5,2 фоизга ўсиши кўрсатиб ўтилган. ЯҲМ 2023 йилда 6 фоизга ва 2024 йилда 6,4 фоизга ўсиши прогноз қилинган.

Қорақалпоғистон Республикасининг асосий макроиқтисодий кўрсаткичлари ҳисобланган саноат соҳасининг ўсиш суръати 2022 йилда 105,2%, қишлоқ хўжалиги соҳасининг ўсиш суръати 103,2% ҳамда чакана товар айланмасининг ўсиш суръати 111% бўлиши режалаштирилган.

Қорақалпоғистон Республикасининг даромад қисми жисмоний шахслардан олинадиган даромад солиғи, юридик шахслардан олинадиган даромад солиғи, жисмоний ва юридик шахслардан олинадиган ер солиғи, йиғимлар, алкогол маҳсулоти ва бензин, дизел ёқилғиси ва газ реализациясидан акциз солиғидан тегишли равишда ўтказиб бериладиган даромадлар ҳисобидан шаклланади.

Энг кўп маблағ ажратиладиган соҳалар:

- соғлиқни сақлаш соҳаси (ташкилот ва соҳалар учун тақсимланган маблағларнинг 32,9%и);

- кам таъминланган ва кўп болали оилаларга моддий ёрдам пуллари (15,4%);

- халқ таълими соҳаси (14,4%);

- инвестиция харажатлари (8,2%);

- давлат ҳокимияти органлари (6,3%);

- ободонлаштириш (5,8%);

- сув хўжалиги (5,1%), ОТМ ва мактаблар реконструкцияси (4,2%).

Жисмоний ва юридик шахслар бўйича (деҳқон хўжалигини юритиш учун берилган қишлоқ хўжалигига мўлжалланган ерлардан ташқари) мутлоқ миқдорда 1 кв. метр учун белгиланган базавий солиқ ставкаларига нисбатан киритилаётган камайтирувчи ва оширувчи коэффициентлар шаҳар ва туманлар кесимида ҳам тасдиқланган. Жумладан, Нукус шаҳри ва Хўжайли, Тахиатош, Амударё, Беруний, Элликқалъа, Тўрткўл туманларида 1 кв. метр учун жисмоний шахсларга нисбатан ўртача 269 сўм ва юридик шахсларга нисбатан ўртача 2898 сўм қийматларида 1,1 коэффициент белгиланган. Бўзатов, Қонликўл, Қораўзак, Кегейли, Қўнғирот, Мўйноқ, Нукус, Тахтакўпир, Чимбой, Шуманай туманларида эса 1 коэффициент белгиланган.

Қишлоқ хўжалигига мўлжалланмаган ерларнинг базавий солиқ ставкаси юридик шахслар бўйича Нукус шаҳри, Хўжайли, Тахиатош, Амударё, Беруний, Элликқалъа, Тўрткўл туманлари учун 1 га ер майдонига 30,8 млн. сўм (1,1 коэффициент), Бўзатов, Қонликўл, Қораўзак, Кегейли, Қўнғирот, Мўйноқ, Нукус, Тахтакўпир, Чимбой, Шуманай туманлари учун 1 га ер майдони қиймати 28 млн. сўм (1,0 коэффициент) этиб белгиланган.

Қишлоқ ва маҳалла фуқаролар йиғинларида иқтисодий ривожланганлик даражасига қараб, 0,7 дан 3,0 гача камайтирувчи ва оширувчи коэффициентлари белгиланади.

Саламат Бегманов

Иқтисодий тадқиқотлар ва ислоҳотлар маркази Қорақалпоғистон Республикаси филиалининг бош илмий ходими

Юсуп Жумабаев

Иқтисодий тадқиқотлар ва ислоҳотлар маркази Қорақалпоғистон Республикаси филиалининг етакчи илмий ходими

Мақолани улашинг

Ўхшаш янгиликлар