Yangiliklar

Hisob palata 2020 yilda 64 mln dollarlik noqonuniy xarajatlarni aniqladi

9.04.2021 11:52
225

Aniqlangan 23,8 mlrd. so‘mlik ($2,3 mln.) kamomad va noqonuniy xarajatlar hamda ortiqcha moliyalashtirilgan 8,4 mlrd. so‘m ($0,8 mln.) mablag‘lar jamg‘armaga qaytarilgan.

Hisob palatasi tomonidan davlat byudjeti va davlat maqsadli jamg‘armalari byudjetlari hisobidan ajratilgan mablag‘lar sarflanishi yuzasidan 2020 yilda o‘tkazilgan nazorat tadbirlari natijasida jami 671,3 mlrd. so‘mlik (64 mln AQSh dollari)noqonuniy xarajatlar aniqlangan.

Bu Oliy Majlis Qonunchilik palatasining navbatdagi majlisida Hisob palatasining 2020 yilgi faoliyati to‘g‘risidagi hisobotda aytib o‘tildi.

Hisob palatasi tomonidan 2020 yilda 87 ta nazorat tadbirlari va tahliliy o‘rganishlar amalga oshirilgan.

Davlat byudjeti va davlat maqsadli jamg‘armalari byudjetlari hisobidan ajratilgan mablag‘lar sarflanishi yuzasidan 2020 yilda o‘tkazilgan nazorat tadbirlari natijasida jami 671,3 mlrd. so‘mlik noqonuniy xarajatlar, kamomad va o‘zlashtirishlar hamda samarasiz xarajatlar, 1 trln. so‘mdan ortiq xarajatlarni optimallashtirish imkoniyatlari aniqlangan.

Inqirozga qarshi kurashish jamg‘armasidan ajratilgan mablag‘lar sarflanishi ustidan Moliya vazirligi bilan hamkorlikda doimiy nazorat o‘rnatilib, aniqlangan 23,8 mlrd. so‘mlik ($2,3 mln.) kamomad va noqonuniy xarajatlar hamda ortiqcha moliyalashtirilgan 8,4 mlrd. so‘m ($0,8 mln.) mablag‘lar jamg‘armaga qaytarilgan.

Halq ta’limi vazirligi muassasalarida 192,2 mlrd. so‘mlik moliyaviy xato, kamchiliklar va o‘zlashtirishlar aniqlangan. Jumladan, xalq ta’limi sohasidagi islohotlarga ko‘maklashish jamg‘armasi mablag‘laridan 21 mlrd. so‘mlik samarasiz xarajatlarga yo‘l qo‘yilgan.

Muhokamalarda deputatlar hisobotda keltirilgan xalqaro moliya tashkilotlari mablag‘lari hisobidan amalga oshirilayotgan loyihalarda muammolar mavjudligiga hamda ularning kelib chiqish sabablariga ham e’tibor qaratdilar. Jumladan, davlat tashqi qarz mablag‘larini jalb qilgan holda 2010 — 2019 yillarda yakunlangan umumiy qiymati 12,6 mlrd. AQSh dollarlik 81 ta loyihalarning 24 tasida xato va kamchiliklar aniqlangan.