Xorazm viloyatining 2022 yil I yarim yilligi yakunlari bo‘yicha asosiy makroiqtisodiy ko‘rsatkichlari tahlili

Xorazm viloyatining 2022 yil I yarim yilligi yakunlari bo‘yicha asosiy makroiqtisodiy ko‘rsatkichlari tahlili

2022 yil I yarim yilligida Xorazm viloyati yalpi hududiy mahsuloti 2021 yilning mos davriga nisbatan 6,1 foizga o‘sdi va 13,4 trln. so‘mni tashkil etdi.

Aholi jon boshiga yalpi hududiy mahsulot hajmi esa 7,0 mln. so‘mni tashkil etib, 2021 yilning mos davriga nisbatan 4,4 foizga o‘sdi.

2022 yilning I yarim yilligi viloyat iqtisodiyoti uchun juda muvaffaqiyatli davr bo‘ldi. Mamlakatimizda amalga oshirilgan keng qamrovli iqtisodiy islohotlar tufayli 2022 yilning I yarim yilligida viloyat iqtisodiyotining ko‘plab tarmoqlarida o‘sish dinamikasiga erishildi.

2022 yilning I yanvar-iyun oylarida viloyatda sanoat mahsulotlarini ishlab chiqarish hajmi 8,3 trln. so‘mni tashkil etib, o‘tgan yilning mos davriga nisbatan 15,4 foizga o‘sdi.

Tahlil qilinayotgan davr mobaynida xalq iste’mol tovarlarini ishlab chiqarish hajmi o‘tgan yilning mos davriga nisbatan 23,5 foizga oshdi. Joriy yilning yanvar-iyun oylarida viloyatda 5,3 trln. so‘mlik xalq iste’moli tovarlari ishlab chiqarilgan.

Tahlil qilinayotgan davr mobaynida qishloq xo‘jaligida 2021 yilning mos davriga nisbatan 3,5 foizga o‘sish kuzatildi va qishloq xo‘jaligi mahsulotlarini ishlab chiqarish hajmi 8,6 trln. so‘mni tashkil etdi.

Shu bilan birga, xizmatlar sohasida sezilarli o‘sish sur’atlari kuzatildi va bu ko‘rsatkich 2021 yilning mos davriga nisbatan 12,5 foizni, ko‘rsatilgan xizmatlar hajmi esa 4,7 trln. so‘mni tashkil etdi.

Bundan tashqari, 2021 yilning mos davriga nisbatan chakana savdo aylanmasi 12,8 foizga oshib, 5,6 trln. so‘mni tashkil etdi.

Shu bilan birga, qurilishda ham o‘sish kuzatilib, o‘tgan yilning mos davriga nisbatan 5,3 foizni tashkil etdi. Joriy yilning birinchi yarmida viloyatda 2,0 trln. so‘mlik qurilish ishlari amalga oshirilgan.

Tahlil qilinayotgan davr mobaynida asosiy kapitalga yo‘naltirilgan investitsiyalar 4,7%ga o‘sdi va ular hajmi 3,4 trln. so‘mni tashkil etdi.

Alohida qayd etish joizki, joriy yilning yanvar-iyun oylarida yangi tashkil etilgan kichik korxonalar soni sezilarli darajada oshdi. Joriy yilning birinchi yarmida 2943 ta kichik biznes sub’yekti tashkil etilgan. Bu ko‘rsatkich o‘tgan yilning shu davriga nisbatan 26,6 foizga ko‘p.

Tahlil qilinayotgan davrda Xorazm viloyatining tashqi savdo aylanmasi 369,5 mln. AQSh dollarini tashkil etdi. Viloyat savdo balansida 116,9 mln. dollarlik salbiy saldo qayd etilganligiga qaramasdan, tahlil qilinayotgan davr mobaynida eksport hajmi o‘tgan yilning mos davriga nisbatan 18,9 foizga o‘sdi va 126,3 mln. dollarni tashkil etdi. Import hajmi esa 243,2 mln. dollarni qayd etdi va o‘tgan yilning mos davriga nisbatan 23,1 foizga oshdi.

Yusup Jumabayev
Iqtisodiy tadqiqotlar va islohotlar markazi yetakchi ilmiy xodimi

Maqolani ulashing

O'xshash yangiliklar