Хоразм вилоятининг 2022 йил I ярим йиллиги якунлари бўйича асосий макроиқтисодий кўрсаткичлари таҳлили

Хоразм вилоятининг 2022 йил I ярим йиллиги якунлари бўйича асосий макроиқтисодий кўрсаткичлари таҳлили

2022 йил I ярим йиллигида Хоразм вилояти ялпи ҳудудий маҳсулоти 2021 йилнинг мос даврига нисбатан 6,1 фоизга ўсди ва 13,4 трлн. сўмни ташкил этди.

Аҳоли жон бошига ялпи ҳудудий маҳсулот ҳажми эса 7,0 млн. сўмни ташкил этиб, 2021 йилнинг мос даврига нисбатан 4,4 фоизга ўсди.

2022 йилнинг I ярим йиллиги вилоят иқтисодиёти учун жуда муваффақиятли давр бўлди. Мамлакатимизда амалга оширилган кенг қамровли иқтисодий ислоҳотлар туфайли 2022 йилнинг I ярим йиллигида вилоят иқтисодиётининг кўплаб тармоқларида ўсиш динамикасига эришилди.

2022 йилнинг I январь-июнь ойларида вилоятда саноат маҳсулотларини ишлаб чиқариш ҳажми 8,3 трлн. сўмни ташкил этиб, ўтган йилнинг мос даврига нисбатан 15,4 фоизга ўсди.

Таҳлил қилинаётган давр мобайнида халқ истеъмол товарларини ишлаб чиқариш ҳажми ўтган йилнинг мос даврига нисбатан 23,5 фоизга ошди. Жорий йилнинг январь-июнь ойларида вилоятда 5,3 трлн. сўмлик халқ истеъмоли товарлари ишлаб чиқарилган.

Таҳлил қилинаётган давр мобайнида қишлоқ хўжалигида 2021 йилнинг мос даврига нисбатан 3,5 фоизга ўсиш кузатилди ва қишлоқ хўжалиги маҳсулотларини ишлаб чиқариш ҳажми 8,6 трлн. сўмни ташкил этди.

Шу билан бирга, хизматлар соҳасида сезиларли ўсиш суръатлари кузатилди ва бу кўрсаткич 2021 йилнинг мос даврига нисбатан 12,5 фоизни, кўрсатилган хизматлар ҳажми эса 4,7 трлн. сўмни ташкил этди.

Бундан ташқари, 2021 йилнинг мос даврига нисбатан чакана савдо айланмаси 12,8 фоизга ошиб, 5,6 трлн. сўмни ташкил этди.

Шу билан бирга, қурилишда ҳам ўсиш кузатилиб, ўтган йилнинг мос даврига нисбатан 5,3 фоизни ташкил этди. Жорий йилнинг биринчи ярмида вилоятда 2,0 трлн. сўмлик қурилиш ишлари амалга оширилган.

Таҳлил қилинаётган давр мобайнида асосий капиталга йўналтирилган инвестициялар 4,7%га ўсди ва улар ҳажми 3,4 трлн. сўмни ташкил этди.

Алоҳида қайд этиш жоизки, жорий йилнинг январь-июнь ойларида янги ташкил этилган кичик корхоналар сони сезиларли даражада ошди. Жорий йилнинг биринчи ярмида 2943 та кичик бизнес субъекти ташкил этилган. Бу кўрсаткич ўтган йилнинг шу даврига нисбатан 26,6 фоизга кўп.

Таҳлил қилинаётган даврда Хоразм вилоятининг ташқи савдо айланмаси 369,5 млн. АҚШ долларини ташкил этди. Вилоят савдо балансида 116,9 млн. долларлик салбий сальдо қайд этилганлигига қарамасдан, таҳлил қилинаётган давр мобайнида экспорт ҳажми ўтган йилнинг мос даврига нисбатан 18,9 фоизга ўсди ва 126,3 млн. долларни ташкил этди. Импорт ҳажми эса 243,2 млн. долларни қайд этди ва ўтган йилнинг мос даврига нисбатан 23,1 фоизга ошди.

Юсуп Жумабаев
Иқтисодий тадқиқотлар ва ислоҳотлар маркази етакчи илмий ходими

Мақолани улашинг

Ўхшаш янгиликлар