Президентнинг “Миллий сифат инфратузилмасини янада такомиллаштиришга оид чора-тадбирлар тўғрисида”ги қарори лойиҳаси Норматив-ҳуқуқий ҳужжатлар лойиҳалар муҳокамаси порталида эълон қилинди.
Қарор лойиҳаси техник жиҳатдан тартибга солиш, стандартлаштириш, сертификатлаштириш ва метрология тизимларини халқаро андозаларга мослаштиришни мақсад қилган.
2021 йил 1 январдан бошлаб шундай тартиб ўрнатиладики, унга мувофиқ:
а) қуйидаги олиб кирилаётган товарларнинг божхона расмийлаштируви жараёнида мувофиқлик сертификати талаб этилмайди:
қонун ҳужжатларида белгиланган тартибда давлат рўйхатидан ўтказилган ҳамда ваколатли идораларнинг тегишли рухсатнома ҳужжатларига эга бўлган ветеринария ва ўсимликлар карантини назоратидаги маҳсулотлар, шунингдек, санитария-эпидемиологик хулосага мос келадиган товарлар рўйхатидаги озиқ-овқат маҳсулотлари;
б) Ўзбекистон божхона ҳудудига олиб келинган товарларни реализация қилинишидан олдин мувофиқлик сертификатини олиш мажбурияти бевосита ушбу товарларни олиб кирган шахсга юклатилади.
2023 йил 1 январгача қуйидагилар маъмурий жавобгарликдан озод қилинади:
- техник регламент ва стандартларнинг мажбурий талабларини бузганлик ҳолатлари юзасидан аниқланган камчиликларни ихтиёрий равишда бартараф этган шахслар;
- ишлаб чиқарилган маҳсулот эркин савдога чиқарилгандан кейинги даврда сифат ва хавфсизлик нуқсонлари аниқланиб, ишлаб чиқарувчи томонидан ихтиёрий равишда савдога чиқарилган маҳсулотларни қайтариб олиш чоралари кўрилганда.
“Ўзстандарт” агентлиги, Иқтисодий тараққиёт ва камбағалликни қисқартириш вазирлиги ҳамда Монополияга қарши курашиш қўмитасининг стандартлаштиришга доир норматив ҳужжатлар тоифасига кирувчи ташкилот стандартларини ишлаб чиқиш жараёнини соддалаштириш ҳақидаги қуйидаги таклифлари маъқулланади:
- ташкилот стандартларини экспертизадан ўтказиш давлат идоралари ва хўжалик бошқаруви органлари томонидан ҳақ олмасдан амалга ошириш ҳамда “Ўзстандарт” агентлиги органларида давлат рўйхатидан ўтказиш тартибини бекор қилиш;
- ишлаб чиқарилаётган маҳсулотларга оид ташкилот стандартларини ҳисобини юритиш мақсадида "Ўзстандарт” агентлиги ишлаб чиқарувчи ташкилот томонидан электрон тарзда хабардор этилиши лозим;
- ташкилот стандартларида белгиланган кўрсаткичлар давлат (миллий) стандарти талабларидан паст бўлган ҳолларда ушбу ташкилот стандартларига асосан сертификатлаштиришга йўл қўйилмайди.
Инвестициялар ва ташқи савдо вазирлиги, “Ўзстандарт” агентлигининг:
- Ўзбекистон стандартлаштириш, метрология ва сертификатлаштириш агентлигининг номини “Ўзбекистон техник жиҳатдан тартибга солиш ва метрология агентлиги” этиб қайта номлаш ҳамда қисқартирилган номини “Ўзстандарт” агентлиги деб сақлаб қолиш;
- Стандартлаштириш, сертификатлаштириш ва техник жиҳатдан тартибга солиш илмий-тадқиқот институтининг номини “Ўзбекистон стандартлар институти” этиб қайта номлаш;
- Ўзбекистон стандартлар институтига Ўзбекистон давлат стандартларни рўйхатдан ўтказишни юклаш;
- “Ўзбекистон илмий-синов ва сифат назорати маркази” давлат корхонасини Стандартлар институтига қўшиб юбориш;
- “Ўзстандарт” агентлигининг марказий аппарати тузилмасида мавжуд штат бирликлар доирасида Саноатни ривожлантириш техник сиёсатини амалга ошириш ва экспортга кўмаклашиш бошқармасини ташкил этиш тўғрисидаги таклифлари маъқулланади.
Қарор лойиҳасини муҳокамаси 11 декабрда якунланади.
Изоҳ қолдириш