Андижон вилоятининг 2021 йилги макроиқтисодий кўрсаткичлари

Андижон вилоятининг 2021 йилги макроиқтисодий кўрсаткичлари

Йил якунига кўра, Андижон вилояти бўйича ялпи ҳудудий маҳсулот (ЯҲМ) ҳажми жорий нархларда 43 790,8 млрд.сўмни ташкил этди ва 2020 йилга нисбатан 4,7%га ўсиш қайд этилди.

Ўзбекистон Республикаси бўйича ЯИМни шакллантиришда Андижон вилоятининг қўшган ҳиссаси 6,0 % ни ташкил этди.

Ўтган йилда янги ташкил этилган кичик тадбиркорлик субъектлари сони 2020 йилга нисбатан 7,5% пасайиб, 7 111 тани ташкил этди. ЯҲМда кичик бизнес ва хусусий тадбиркорликнинг улуши 71,8% (2020 йилда 69,9%)ни ташкил қилган.

Жон бошига тўғри келадиган ЯҲМ ҳажми 13 596,2 минг сўмни ташкил қилган ҳолда, 2020 йилга нисбатан 2,7%га ошган.

Асосий капиталга инвестициялар ҳажми 12143,7 млрд.сўмни ташкил этиб, 2020 йилга нисбатан 15,3%га ўсиш қайд этилди.

ЯҲМ таркибида саноат улуши қурилишни қўшган ҳолда 26,5% (2020 йилда 28,7), қишлоқ хўжалиги улуши 43,3% (2020 йилда 42,6%) ва хизмат кўрсатиш улуши 30,2% (2020 йилда 28,7%) ни ташкил қилган.

Саноат

Вилоятда ўтган йили ишлаб чиқарилган саноат маҳсулотлари 35 916,2 млрд.сўмни ташкил этиб, 2020 йилга нисбатан 1,4%га пасайиш кузатилган. Вилоятда ишлаб чиқарилган саноат маҳсулотларининг республика саноатидаги улуши 8%ни ташкил қилган. Жон бошига тўғри келадиган саноат маҳсулотлари ҳажми 11 151,3 минг сўмни ташкил этиб, 2020 йилга нисбатан пасайиш кузатилган.

Истеъмол товарлари

Вилоятда 25 311,1 млрд.сўмлик истеъмол товарлари ишлаб чиқарилган бўлиб, 2020 йилга нисбатан 7,5%га пасайган. Республика истеъмол товарларида вилоятнинг улуши сезиларли даражада юқори бўлиб, 16,6%ни ташкил қилган.

Қишлоқ хўжалиги

Андижон вилояти 2021 йилда Республика қишлоқ хўжалик маҳсулотларининг 10,1%ини етиштирган бўлиб, қишлоқ хўжалиги маҳсулотлари ҳажми 32 030,4 млрд.сўмни ташкил этган. Бу кўрсаткич 2020 йилга нисбатан 4,5%га ошган. Жон бошига тўғри келадиган қишлоқ хўжалиги маҳсулотлари ҳажми 9 944,9 минг сўмни ташкил этиб, 2020 йилга нисбатан 2,5%га ўсиш кузатилган.

Қурилиш ишлари

Вилоятда ташкил этилган қурилиш ишлари ҳажми 5619,1 млрд.сўмга етиб, 2020 йилга нисбатан 7,9%га ошган. Вилоятда қурилиш ишлари ҳажмининг республика кўрсаткичидаги улуши 5,2%ни ташкил қилган.

Чакана савдо

Вилоятда ўтган йилда чакана савдо ҳажми 17 715,9 млрд.сўмни ташкил этиб, 2020 йилга нисбатан 7,9%га ошган. Чакана савдо товар айланмасининг 90,3%и кичик бизнес ва хусусий тадбиркорлик субъектлари томонидан амалга оширилган.

Хизмат кўрсатиш

Андижон вилоятида кўрсатилган бозор хизматлари ҳажми 14 970,5 млрд.сўмни ташкил этиб, 2020 йилга нисбатан 21,3%га ошган. Жон бошига тўғри келадиган кўрсатилган бозор хизматлари ҳажми 4 648,1 минг сўмни ташкил қилган ҳолда, 2020 йилга нисбатан 18,9%га ошган.

Ташқи савдо айланмаси

Ташқи савдо айланмаси ҳажми 3 166,1 млн.долларни ташкил қилган ҳолда, 2020 йилга нисбатан 13,3%га ошган. Вилоят ташқи савдо айланмасининг республика жами ташқи савдо айланмасидаги улуши 7,5%ни ташкил қилган.

2021 йилда жами амалга оширилган экспорт ҳажми - 979,5 млн.долларни ташкил қилиб, 2020 йилга нисбатан 67,7%га ортгани кузатилган. Импорт ҳажмида эса 2020 йилга нисбатан 1,1%га пасайиш кузатилиб, 2 186,7 млн.долларни ташкил этган

Шоирахон Нурдинова

Иқтисодий тадқиқотлар ва ислоҳотлар маркази

Наманган филиали бош илмий ходими

Мақолани улашинг

Ўхшаш янгиликлар