Жаҳон банкининг Тараққиёт сиёсати дастури (DPO) тузилмавий ислоҳотларни амалга ошириш, сармоявий муҳитни яхшилаш ва турмуш даражасини оширишда мамлакатларни қўллаб-қувватлашга қаратилган.
DPO (Тараққиёт сиёсати дастури) – бу – мамлакатнинг инклюзив ва рақобатбардош бозор иқтисодиётига ўтишини тезлаштирадиган муҳим иқтисодий ва ижтимоий ислоҳотларни амалга оширишини қўллаб-қувватлаш учун Жаҳон банки томонидан бериладиган паст фоизли имтиёзли кредит ҳисобланади.
Учрашувдан мақсад иқтисодий ривожланиш дастурининг навбатдаги босқичини муҳокама қилиш эди. Учрашувда Марказ директори Ўзбекистонда амалга оширилаётган кенг кўламли ислоҳотлар, шунингдек, ислоҳотларни баҳолаш ва уларнинг мамлакатдаги иқтисодий вазиятга таъсири бўйича Марказ тадқиқотлари натижалари билан таништирди.
Жаҳон банки экспертлари Ўзбекистонда Президент Шавкат Мирзиёев раҳнамолигида амалга оширилаётган ислоҳотлар самараларини юқори баҳолаб, уларнинг мамлакат иқтисодиёти ривожига катта таъсирини қайд этди.
Сўнгра иштирокчилар ислоҳотларни амалга оширишда, жумладан, иқтисодий ислоҳотларни баҳолаш моделлари ва симуляцияларини ишлаб чиқиш, Ўзбекистоннинг Жаҳон савдо ташкилотига (ЖСТ) қўшилиши таҳлили ва унинг иқтисодиёт тармоқларига таъсири каби муҳим йўналишларда биргаликдаги саъй-ҳаракатларнинг муҳимлигига эътибор қаратдилар.
Экспертлар экспорт субсидияларини бекор қилиш самарасини ўрганиш зарурлигини таъкидладилар.
Томонлар ислоҳотлар кун тартибини, жумладан, давлат молия сиёсати ва дастурий бюджетлаштириш соҳасидаги ҳамкорликни ҳам муҳокама қилдилар. Мутахассислар давлат молия тизими ва солиқ сиёсати масалалари бўйича таҳлилий ишларни олиб бориш муҳимлигини таъкидладилар.
Муҳокаманинг муҳим жиҳати Ўзбекистон иқтисодиёти учун барқарор ўсиш ва салмоқли салоҳиятни намойиш этаётган IТ-соҳаси бўлди. Хусусан, ушбу соҳадаги хизматлар экспорти 1 миллиард долларга етиши мумкинлиги тахмин қилинмоқда.
Бундан ташқари, экспертлар минтақавий ривожланиш стратегиялари, қишлоқ хўжалигини ислоҳ қилиш ва норасмий иқтисодиёт муаммоларини муҳокама қилдилар.
Учрашув якунлари бўйича томонлар режалаштирилган ташаббусларни амалга ошириш бўйича ҳамкорликни янада ривожлантиришга ишонч билдирдилар, бу эса долзарб иқтисодий муаммоларни янада самарали ҳал этиш имконини беради ва Ўзбекистоннинг барқарор ривожланишига кўмаклашади.
Иқтисодий тадқиқотлар ва ислоҳотлар маркази
Жамоатчилик билан алоқалар хизмати
Изоҳ қолдириш