Молия вазирлиги Ўзбекистон Республикаси Давлат бюджети даромадлар қисмининг 2020 йил ижроси бўйича дастлабки натижаларини эълон қилди.
Унга кўра, давлат бюджети даромадлари 2020 йилда 132,9 трлн. сўмни (ЯИМга нисбатан 22,5 %) ташкил этган бўлиб, 2018 йилга нисбатан 68 %га, 2019 йилга нисбатан эса 18,5 %га ошган. Шунингдек, 2018 йилда бюджет даромадлари 79,1 трлн. сўмни (ЯИМга нисбатан 19,4 %), 2019 йилда эса 112,2 трлн. сўмни (ЯИМга нисбатан 21,9 %) ташкил этган.
Таъкидланишича, бюджетдан ташқари жамғармалар билан биргаликда Консолидациялашган бюджет даромадлари 2020 йилда 154 трлн. сўмни (ЯИМга нисбатан 26 %) ташкил этган. Консолидациялашган бюджет 2018 йилга нисбатан 1,4 баробардан кўпроқ, 2019 йилга нисбатан 1,1 баробардан кўпроқ ошган. Консолидациялашган бюджет даромадлари 2018 йилда 107 трлн. сўмни (ЯИМга нисбатан 26,3 %), 2019 йилда эса 137,1 трлн. сўмни (ЯИМга нисбатан 26,7 %) ташкил этган.
Сўнгги йилларда Давлат бюджети даромадларининг ЯИМга нисбатан ўсиши Консолидациялашган бюджет даромадларининг ўсишини сақлаб қолмоқда. Бу биринчи навбатда ўтказилган солиқ ислоҳотлари, хусусан мажбурий ажратмаларнинг (3,2%) ва фуқаролар суғурта бадалларининг (иш ҳақи фондидан 8%) бекор қилиниши билан боғлиқ.
Изоҳ қолдириш