Инфографика: Ўзбекистон-Хитой савдо-инвестициявий ҳамкорлиги

Ўзбекистоннинг Хитой билан савдоси

Хитой Ўзбекистоннинг етакчи савдо ҳамкорларидан бири ва Ўзбекистон иқтисодиётининг етакчи инвесторидир.

Иқтисодий тадқиқотлар ва ислоҳотлар маркази таҳлили шуни кўрсатадики, кейинги йилларда Ўзбекистон ва Хитой ўртасидаги савдо-иқтисодий ва сармоявий ҳамкорлик жадал ривожланиб, ҳамкорликнинг янги йўналишларини қамраб олган.

2017-2022 йилларда ўзаро товар айирбошлашнинг умумий ҳажми 4,7 миллиард доллардан (2017 йилда) 8,9 миллиард долларгача (2022 йилда 2021 йилга нисбатан ўсиш – 19,9 фоиз) 1,9 баробар ошди.

Ўзбекистоннинг Хитойга экспорти 2017 йилда 2,0 миллиард доллардан (2022 йилда) 2,5 миллиард долларга (2022 йилда) қарийб 1,3 баробар, импорт 2017 йилдаги 2,7 миллиард доллардан 2022 йилда 6,4 миллиард долларгача 2,4 баробар ошди.

2022 йилда Ўзбекистоннинг Хитойга экспорт қилинадиган асосий товарлари мева-сабзавот (5 фоиз), табиий газ (35 фоиз), ип-калава ва ипак (11 фоиз), мис ва ундан тайёрланган буюмлар (14 фоиз), пластмасса ва улардан тайёрланган буюмлар (2%) бўлди.

2022 йилда Хитойдан импорт қилинган маҳсулотларнинг асосий қисмини машина ва ускуналар (46%), транспорт воситалари (10%), пластмасса, каучук ва улардан тайёрланган буюмлар (10%), темир, металл ва улардан тайёрланган буюмлар (6%) ташкил этди.

Инвестициявий ҳамкорлик

Хитойнинг тўғридан-тўғри инвестициялари Ўзбекистоннинг бошқа етакчи ҳамкорлари капитали билан бир қаторда Ўзбекистон иқтисодиётининг қатор тармоқларида ҳам фаол иштирок этмоқда.

2017 йилдан буён Хитойнинг Ўзбекистон иқтисодиётига киритган сармояси 5 баробар ошиб, 12 миллиард долларга етди.

2022 йил якунларига кўра Хитойнинг инвестициялари 1,67 миллиард долларни (тўғридан-тўғри инвестиция – 739 млн доллар), 2023 йил январь-сентябрь ойларида Хитойнинг Ўзбекистонга инвестицияларининг умумий ҳажми 2,22 миллиард долларни (тўғридан-тўғри инвестиция – 1,01 миллиард доллар) ташкил этди.

Инвестициявий ҳамкорлик йўналишлари: энергетика, шу жумладан қайта тикланадиган энергия, нефт-газ, кимё, енгил, автомобилсозлик, электротехника, қурилиш материаллари ишлаб чиқариш, телекоммуникация, соғлиқни сақлаш, фармацевтика, қишлоқ хўжалиги ва бошқалар.

Бугунги кунда Ўзбекистонда Хитой капитали иштирокидаги 2125 корхона мавжуд бўлиб, бу 6 йил аввалгидан 2,5 баравар кўпдир. Бу Ўзбекистонда мавжуд бўлган чет эл капитали иштирокидаги барча компаниялар умумий сонининг 15 фоизини ташкил этади. Ўтган йилнинг атиги 11 ойида Хитой капитали иштирокида 605 та янги корхона ташкил этилди.

Ўзбекистон бозорида Хитойнинг "Huawei", "ZTE", "Wenzhou Jinsheng Trading", "СП Peng Sheng", "Sinotruk", "Heng Bang Textile Central Asia" ва бошқа йирик компаниялари ўз фаолиятини амалга оширмоқда.

Яқинда "BYD" гибрид автомобилларини йиғиш бўйича қўшма корхона ташкил этилди. Пенгшенг саноат парки фаолият кўрсатмоқда. Доривор моддаларни синтез қилиш учун Ўзбекистон-Хитой тиббиёт технопарки барпо этилмоқда.