Ўзбекистонда ишбилармонлик фаоллиги индекси март ойида сезиларли ўсди

Жорий йилнинг март ойида ИФИ компонентлари даражасидаги қуйидаги ўзгаришлар кузатилди:

- хўжалик юритувчи субъектларнинг банк ҳисоб-варақларидаги операциялар сони бўйича компонент 4,3 фоизга ортган;

- товар-хом ашё биржасида хом-ашё сотиб олиш жадаллиги 46,2 фоизга ошган;

- фаолият кўрсатаётган хўжалик юритувчи субъектлар бўйича компонент 3,8 фоизга ортган;

- товар белгилари бўйича компонент 8,1 фоизга камайган;

Шунингдек, 2026 йил март ойида ИФИ барча ҳудудда ўтган ойга нисбатан ўсиши кузатилган (График №2).

ИФИнинг ўсиши барча ҳудудларда қайд этилди. Энг юқори ўсиш суръатлари Андижон (47,8%), Сурхондарё (43,7%), Хоразм (42,3%) ва Самарқанд (41,8%) вилоятларида кузатилди.

Ҳисобот даврида банклараро тўлов операциялари сони 7 052,5 минг тани ташкил этиб, 2026 йилнинг февраль ойига нисбатан 292,2 минг транзаксияга (4,3%) ортган.

Банклараро тўлов операциялари сони 13 та ҳудудда ортган. Хусусан, Андижон (13,5 %), Фарғона (8,2 %), Сирдарё (6,9 %) ва Сурхондарё (5,5 %) вилоятларида юридик шахслар ўртасидаги банк операциялари сони ўтган ойга нисбатан сезиларли ортган. Бу кўрсаткич Қорақалпоғистонда 1,1 %га камайган.

Жорий йилнинг март ойида ИФИнинг биржа компоненти 1,4621 бирликни ташкил этган (ўтган ойга нисбатан 46,2 фоизга ортган). Бунда, тузилган битимлар сони 2,1 бараварга ортганлиги ва ҳар бир битим бўйича сотиб олинган товарларнинг ўртача ҳажми 14,6 фоизга камайганлиги кузатилди.

Республика товар-хом ашё биржасида асосий 34 турдаги товарлар савдосининг умумий айланмаси ҳажми 2026 йил март ойида 7 460 млрд. сўмни ташкил этиб, ушбу кўрсаткич ўтган ойга нисбатан 18,5 фоизга ортган.

Бунда, биржа савдолардаги ушбу фаолликда азот-фосфорли ўғит савдоси ҳажмининг ўтган ойга нисбатан 93,1 бараварга, арматура 6,5 баравар, қора металл прокати 4 баравар ва полипропилен 3,4 бараварга ортиши асосий омил ҳисобланади.

Ҳисобот даврида фаолият юритаётган хўжалик субъектлари компоненти 1,0382 бирликни ташкил этиб, олдинги ойга нисбатан 3,8 фоизга ортган. Бунда, барча турдаги фаолият юритаётган хўжалик юритувчи субъектлар сони олдинги ойга нисбатан 2 557 бирликка ортиб, 511 мингтани ташкил этган; йирик тадбиркорлик билан шуғулланувчи корхоналар сони эса 558 тага ошиб, 4 719 тани ташкил этган; кичик корхоналар сони 2,2 мингтага ортиб, 417,3 мингтага етган. Шунингдек, фермер хўжаликлари сони 185 тага камайиб, 89,1 мингтани ташкил этган.

2026 йилнинг март ойида савдо белгилари бўйича компонент 0,9186 бирликни ташкил этиб, ўтган ойга нисбатан 8,1 фоизга камайган. Мазкур даврда юридик шахслар томонидан 395 та товар белгилари ва товар номлари рўйхатга олинган.

Жадвал №1

Ўзбекистон Республикаси ва минтақалар бўйича ИФИ компонентларининг ўтган ойга нисбатан ўзгариши

Жадвал №2

Ўзбекистон Республикаси ва минтақалар бўйича ИФИ компонентларининг ўтган йилнинг мос ойига нисбатан ўзгариши

Islombek Saparmatov, CERR