Иқтисодий тадқиқотлар ва ислоҳотлар маркази (Марказ) ўзининг навбатдаги ҳисоботида март ойи якунлари бўйича Ўзбекистон кўчмас мулк бозорида юз берган ўзгаришлар таҳлилини тақдим этди.
Кўчмас мулк бозоридаги фаоллик кетма-кет иккинчи ой пасайишда давом этмоқда. Март ойида битимлар ҳажми 8,8%га камайиб, 20,4 мингтани ташкил этди.
Шунга қарамай, бозор йиллик кўрсаткичларда барқарор ўсишни кўрсатмоқда – март ойида тузилган битимлар сони 2024 йилнинг мос даврига нисбатан 15%га ошди. 2025 йилнинг I чораги якунларига кўра, битимлар умумий сони 68,4 мингтага етиб, ўтган йилга нисбатан 10,8%га ўсди.
Ҳудудий динамика
Фаолликнинг энг сезиларли ўсиши Жиззах (34%) ва Навоий (29%) вилоятларида қайд этилди.
Шу билан бирга, 2021 йилда тизимли кузатувлар бошланганидан буён биринчи марта, биринчи чорак якунига кўра, бирон бир ҳудудда савдо ҳажмининг пасайиши қайд этилмади.
Иккиламчи бозордаги уй-жой нархлари
Март ойида мамлакатда иккиламчи бозорда уй-жойларнинг ўртача нархи февраль ойи даражасида қолди. Йиллик ҳисобда республикада бир квадрат метр уй-жой нархи 0,9%га ошди. Ҳудудлар кесимида энг сезиларли ўсиш Жиззах (12,3%), Сурхондарё (10,7%) ва Қашқадарё (8,5%) вилоятларида кузатилди.
Тошкент шаҳрида кўчмас мулк бозоридаги вазият
Март ойида Тошкент шаҳри кўчмас мулк бозорида иккиламчи уй-жойларнинг ўртача нархи 0,6%га, бирламчи бозор нархлари эса 0,4%га камайган.
Ўтган йилнинг март ойига нисбатан иккиламчи уй-жойларнинг ўртача нархи 5,7%га камайган бўлса, бирламчи уй-жой сегментида пасайиш 3,7%ни ташкил этди.
Йиллик ҳисобда Тошкент шаҳри бўйича иккиламчи уй-жой нархида энг катта пасайиш Миробод (8%), Чилонзор (8,7%) ва Яшнобод ( 7,5%) туманларида кузатилди.
Янги уйлар нархларида ҳам пасайиш кузатилди. Йил давомида бир квадрат метр учун ўртача нархларда энг сезиларли пасайиш Шайхонтоҳур (14,7%), Учтепа (11%) ва Юнусобод (6,7%) туманларида қайд этилди.
Уй-жой ижара бозори
Март ойида Тошкент шаҳрида ижара нархларида ўзгариш кузатилмади ва ўртача ижара нархи 8 долларни (бир квадрат метр учун) ташкил этди.
Пойтахтнинг Миробод, Шайхонтоҳур ва Яккасарой туманларида ижара нархи нисбатан юқорилигича қолмоқда. Ушбу туманларда ижара нархи бир квадрат метр учун ўртача 10 долларни ташкил этади.
Шу билан бирга, Тошкент шаҳрида ижара нархи йиллик ҳисобда 7,4%га пасайган. Нархларнинг энг катта пасайиши Мирзо-Улуғбек, Яшнобод ва Чилонзор туманларида қайд этилиб, пасайиш суръати ўртача 10%га етади.
Жалолиддин Усмонов,
Иқтисодий тадқиқотлар ва ислоҳотлар маркази
Жамоатчилик билан алоқалар бўлими
тел: (78) 150 02 02 (417)
Изоҳ қолдириш