Қашқадарё вилоятининг 2022 йилнинг 1-чораги учун асосий макроиқтисодий кўрсаткичлари

Қашқадарё вилоятининг 2022 йилнинг 1-чораги учун асосий макроиқтисодий кўрсаткичлари

2022 йилнинг январь-март ойларида Қашқадарё вилоятининг ялпи ҳудудий маҳсулот (ЯҲМ) ҳажми 8 360,5 млрд сўмни, ўсиш кўрсаткичи 2021 йилнинг мос даврига нисбатан 103,2%ни (ўсиш кўрсаткичи бўйича ҳудудлар орасида 13-ўрин) ташкил қилди.

Вилоятда яратилган ЯҲМнинг республика ялпи ички маҳсулотидаги улуши 5,1% (2021 йилнинг мос даврида 5,4%) бўлган ҳолда Тошкент шаҳри, Тошкент, Навоий, Самарқанд, Фарғона вилоятларидан кейинги 6-ўринни эгаллаган.

ЯҲМ таркибида саноатнинг улуши (қурилишни қўшган ҳолда) - 31,4% (ўтган йилнинг мос даврида 33,3%), қишлоқ хўжалиги - 21,0% (20,8%) ва хизмат кўрсатиш - 47,6% (45,9%) ни ташкил қилган. ЯҲМнинг 57,4% (ўтган йилнинг мос даврида 56,9%) кичик бизнес ва хусусий тадбиркорлик субъектлари томонидан яратилган.

Жон бошига тўғри келадиган ЯҲМ ҳажми 2447,6 минг сўмни ташкил қилган ҳолда (Ҳудудлари орасида 11-ўрин) ўтган йилнинг мос даврига нисбатан 101,0 %га ошган.

Саноат

Вилоятда 4702,4 млрд сўмлик саноат маҳсулотлари ишлаб чиқарилган бўлиб, ўтган йилнинг мос даврига нисбатан 104,7% (ўсиш кўрсаткичи бўйича ҳудудлар орасида 10-ўрин)га ошган. Вилоятда ишлаб чиқарилган саноат маҳсулотларининг республика саноатидаги улуши 4,1%ни ва ҳудудлар орасида 7-ўринни эгалланган. Саноат маҳсулотларининг 23,8%и (ўтган йилнинг мос даврида 21,6%) кичик бизнес ва хусусий тадбиркорлик субъектлари томонидан яратилган. Шунингдек, вилоят саноати таркибида тоғ-кон саноатининг улуши – 7,0%, ишлаб чиқариладиган саноат - 68,1%, электр, газ, буғ билан таъминлаш ва ҳавони кондициялаш саноати - 24,2%, сув билан таъминлаш, канализация тизими, чиқиндиларни йиғиш ва утилизация қилиш саноати - 0,7%ни ташкил қилган.

Жон бошига тўғри келадиган саноат маҳсулотлари ҳажми 1376,7 минг сўм (Ҳудудлар орасида 12-ўрин) бўлган ҳолда ўтган йилнинг мос даврига нисбатан 102,5%га ошган.

Истеъмол товарлари

Вилоятда 832,0 млрд сўмлик (2021 йилнинг мос даврига нисбатан 102,7%) истеъмол товарлари ишлаб чиқарилган бўлиб, республикадаги улуши 2,3%ни ташкил қилган ҳолда ҳудудлар орасида 12-ўринни эгаллаган. Таҳлил қилинаётган давр мобайнида ишлаб чиқарилган озиқ-овқат товарлари ҳажми 539,3 млрд сўм (ўсиш кўрсаткичи 102,5%), ноозиқ-овқат товарлари 292,7 млрд сўмни (102,9%) ташкил қилган.

Қишлоқ хўжалиги

Вилоятда 2746,4 млрд сўмлик қишлоқ хўжалик маҳсулотлари ишлаб чиқарилган бўлиб, ўтган йилнинг мос даврига нисбатан 101,1%га ошган. Республика қишлоқ хўжалигида вилоятнинг улуши 8,2% бўлган ҳолда, ҳудудлар орасида 6-ўринни эгаллаган.

Жон бошига тўғри келувчи қишлоқ хўжалиги маҳсулотлари ҳажми 804,0 минг сўмни (Ҳудудлар орасида 9-ўрин), 2021 йилнинг мос даврига нисбатан 98,9%ни ташкил қилган.

Хизмат кўрсатиш

Кўрсатилган бозор хизматлари ҳажми 3353,7 млрд сўм бўлган ҳолда, 112,5%га ошган. Хизматлар ҳажмининг республика кўрсаткичидаги улуши 4,5% бўлиб, ҳудудлар орасида 7-ўринни эгаллаган. Жон бошига тўғри келадиган хизматлар ҳажми 981,8 минг сўм (ҳудудлар орасида 14-ўрин) бўлган ҳолда, ўтган йилнинг мос даврига нисбатан 110,1 %га ошган.

Чакана савдо

Чакана савдо ҳажми 3719,7 млрд. сўм (104,7%), республикадаги улуши 6,3%ни бўлган ҳолда, ҳудудлар орасида 6-ўринни эгаллаган. Жон бошига тўғри келувчи чакана савда ҳажми 1089,0 минг сўм (ҳудудлар орасида 12-ўрин)ни ташкил этиб, 102,4%га ошган.

Қурилиш ишлари

Қурилиш ишлари ҳажми 1 441,7 млрд. сўмни (ўтган йилнинг мос даврига нисбатан 94,6%), республикадаги улуши 6,0%ни ташкил этиб, ҳудудлар орасида 6-ўринни эгаллаган.

Асосий капиталга киритилган инвестициялар

Асосий капиталга киритилган инвестициялар ҳажми 3 668,2 млрд сўмни (ўтган йилнинг мос даврига нисбатан 121,5%), республикадаги улуши 7,3% (ҳудудлар орасида 4-ўрин)ни ташкил қилган. Жон бошига тўғри келадиган асосий капиталга киритилган инвестициялар ҳажми 1 073,9 минг сўм бўлиб (2021 йилнинг мос даврига нисбатан 118,9%), ҳудудлар орасида 7-ўринни эгаллаган.

Ташқи савдо айланмаси

Ташқи савдо айланмаси ҳажми 146,8 млн долларни ташкил қилган ҳолда 159,9%га ошган. Вилоят ташқи савдо айланмасининг республика жами ташқи савдо айланмасидаги улуши 1,1% бўлиб, ҳудудлар орасида 12-ўринни эгаллаган. Ташқи савдо айланмаси таркибида экспорт ва импортнинг улуши тенг (73,4 млн доллардан) бўлган. Хусусан, жорий йилнинг январ-март ойлари мобайнида экспорт ҳажми ўтган йилнинг мос даврига нисбатан 152,1%га, импорт ҳажми эса 168,5%га ошган. Вилоятда амалга оширилган экспорт ва импортнинг республика кўрсаткичидаги улуши мос равишда 1,3% ва 1,0% ни ташкил қилган.

2022 йилнинг январь-март ойларида вилоятда 1764 та (ўтган йилнинг мос даврида 3050 та) янги кичик бизнес субъектлари ташкил этилган.

Анвар Қобилов

Иқтисодий тадқиқотлар ва ислоҳотлар маркази

Сектор мудири

Мақолани улашинг

Ўхшаш янгиликлар