Тошкентда “ИННОПРОМ. Марказий Осиё” халқаро кўргазмаси иш бошлади
“ИННОПРОМ. Марказий Осиё” халқаро кўргазмаси ишбилармонлик алоқалари, инновацион ечимлар, мунозаралар ва давра суҳбатлари.
25 апрель куни “Ўзэкспомарказ” миллий кўргазмалар мажмуасида старт олган “ИННОПРОМ. Марказий Осиё” халқаро кўргазмасида дунёнинг ўндан зиёд мамлакатидан келган турли соҳа вакиллари меҳмон бўлиб турибди. Уч кун давомида иштирокчиларнинг профессионал мулоқот майдонига айланадиган тадбир юртимизнинг иқтисодий, инвестициявий, саноат ҳаётидаги яна бир муҳим воқеликдир.
Кўргазмада Ўзбекистон, Россия, Белорусь, Венгрия, Франция, Қозоғистон ва бошқа давлатлардан 700 дан ошиқ ишлаб чиқариш компаниялари ва бизнес делегациялари, 1300 дан ортиқ жисмоний шахслар қатнашмоқда.
26 апрель куни “Инновацион ҳамкорлик тизимини ривожлантириш” мавзуси муҳокама қилинди. Унда Бардин номидаги “Чермет”, ФДУ Марказий илмий-тадқиқот институти, “Магнитогорск” темир-пўлат комбинати, “Олмалиқ кон-металлургия комбинати” AЖ, “Ўзметкомбинат” AЖ, “Металлоинвест”, “Энтер инжиниринг ЛТД”, “Тошкент металлургия комбинати” каби металлургия соҳасининг қатор етакчи компания вакиллари иштирок этди.
Ушбу муҳокама доирасида НИТУ МИСИС, “Ўзметкомбинат” AЖ ва НИТУ МИСИС Олмалиқ филиали ўртасида ўзаро англашув меморандуми имзоланди. Имзолаш маросимида НИТУ МИСИС фан ва инновациялар бўйича проректори М.Р. Филонов, “Ўзметкомбинат” AЖ бошқаруви раиси Р.Х. Пирматов ва “МИСиС” AФ НИТУ директори Ф.Я. Умаров иштирок этдилар. Мазкур келишув томонларга фан-таълим-ишлаб чиқариш соҳасида ўзаро интеграциялашувда кенг имкониятлар очади.
Бугун кўргазма майдонида “Россия ва Ўзбекистон университетларининг бўлажак соҳа етакчиларини тайёрлашнинг энг оммабоп ва долзарб йўналишлари бўйича ўзаро ҳамкорлиги” мавзусидаги “давра суҳбати” бўлиб ўтмоқда.
Ушбу сессияда НИТУ МИСИС биринчи проректори С.Салиҳов сўзга чиқди. “Давра суҳбати” ишида Ўзбекистон Республикаси Олий ва ўрта махсус таълим вазирлиги ҳамда Ўзбекистон ва Россиянинг қатор олий ўқув юртлари вакиллари ҳам иштирок этмоқда.
Изоҳ қолдириш