Soliq organlari faoliyati yuzasidan jamoatchilik fikri har chorakda o‘rganilib, natijalar OAVda e’lon qilib boriladi.
O‘zbekiston Respublikasi Prezidentining “Soliqlarning yig‘iluvchanlik darajasini oshirish va faol soliq to‘lovchilarni rag‘batlantirish chora-tadbirlari to‘g‘risida”gi qarori ijrosi doirasida mamlakatda soliq intizomini mustahkamlash, aholi va biznes o‘rtasida fiskal madaniyatni oshirish hamda yashirin iqtisodiyot ulushini qisqartirishga qaratilgan bir qator muhim yangiliklar amaliyotga joriy etilmoqda.
Endilikda davlat organlari xodimlarining soliq qarzdorligi yuzasidan umumlashtirilgan ma’lumotlar har chorak yakuni bilan keyingi oyning 25-sanasiga qadar Soliq qo‘mitasining rasmiy veb-saytida e’lon qilib boriladi. Bu davlat xizmatchilarining soliq to‘lashda jamoatchilik oldida namuna bo‘lishini ta’minlaydi hamda tizimda shaffoflik va javobgarlikni kuchaytiradi.
2026 yilning 1 martiga qadar Soliq qo‘mitasi tomonidan zamonaviy o‘quv va axborot resurslarini o‘z ichiga olgan yangi interaktiv portal ishga tushiriladi. Unda:
Shuningdek, mamlakat bo‘ylab oliy va o‘rta maxsus ta’lim muassasalari va jamoat joylarida “Soliq to‘la — kelajakka hissa qo‘sh”, “Soliq — mahalla taraqqiyotining garovi”, “To‘langan soliq — biznes ravnaqi” kabi targ‘ibot aksiyalari doimiy o‘tkazib boriladi.
Markaziy bank tijorat banklari va to‘lov tashkilotlari bilan hamkorlikda jismoniy shaxslar soliq qarzdorligi haqidagi ma’lumotlarni mobil ilovalarda asosiy ekranda ko‘rsatish tizimini joriy etadi. Bu fuqarolarga soliq majburiyatlarini o‘z vaqtida nazorat qilish imkonini beradi.
Iqtisodiyot va moliya vazirligi huzurida soliq va bojxona ma’murchiligini takomillashtirish, yashirin iqtisodiyotni qisqartirish va fiskal tahlillarni amalga oshirish bilan shug‘ullanuvchi yangi institut — Fiskal tahlillar instituti tashkil etilmoqda. U Byudjet–soliq tadqiqotlari instituti vazifalarini to‘liq qabul qiladi.
Institut zimmasiga yashirin iqtisodiyotning sabab va omillarini chuqur tahlil qilish va ularni bartaraf etish bo‘yicha takliflar ishlab chiqish, soliq to‘lash madaniyatini oshirish va fiskal shaffoflikni kuchaytirish, soliq va bojxona ma’murchiligini takomillashtirish hamda tizimli muammolarni aniqlab, ularni hal etish vazifalari yuklatilgan.
Shuningdek, milliy iqtisodiyot va fiskal barqarorlikka ta’sir etuvchi siyosatlarni baholash, davlat byudjeti daromad va xarajatlarini prognozlashtirish, mahalliy byudjetlar bazasini mustahkamlash bo‘yicha amaliy takliflar tayyorlash kabi ustuvor yo‘nalishlarda ish olib boriladi.
Soliq savodxonligini oshirish bo‘yicha axborotlar OAVda bepul joylashtiriladi. Soliqlarga oid huquqiy bilimni oshirish, soliqlarni o‘z vaqtida to‘lashni targ‘ib qilishga qaratilgan materiallar “ijtimoiy axborot” sifatida belgilanadi va ular ommaviy axborot vositalarida bepul joylashtiriladi. Bu aholi uchun soliq masalalarida ochiqlik va tushunarlilikni ta’minlashga qaratilgan.
Jamoatchilik fikri doimiy o‘rganiladi. 2026 yildan boshlab har chorakda aholi, tadbirkorlik sub’yektlari va fuqarolik jamiyati vakillarining soliq organlari faoliyati haqidagi fikrlari o‘rganiladi. So‘rovlar natijalari ochiq-oshkora tarzda ommaviy axborot vositalari orqali e’lon qilib boriladi. Bu soliq organlari faoliyatida shaffoflik va hisobdorlikni kuchaytirishni maqsad qiladi.
Qabul qilingan yangi tartib fuqarolarning soliq masalalari bo‘yicha xabardorligini oshirish, byudjet tushumlarini ta’minlashda adolatli mexanizmlarni joriy etish va soliq organlari hamda jamoatchilik o‘rtasidagi ishonchni mustahkamlashga xizmat qiladi.
Izoh qoldirish