Ўзбекистонда ишбилармонлик фаоллиги индексининг мўътадил камайиши кузатилди

График №1

2024 йил ноябрь ойида ИФИ ўтган ойга нисбатан 2,9 фоизга камайди

Компонентлар даражасида қуйидаги ўзгаришлар бўлган.

2024 йилнинг ноябрь ойида Ишбилармонлик фаоллиги индекси ўтган ойга нисбатан 2,9 фоизга камайиб, 971 бирликни ташкил этиши, қуйидаги компонентлар даражасидаги ўзгаришларга боғлиқ бўлган:

• хўжалик юритувчи субъектларнинг банк ҳисобварақаларидаги опреациялар сони 6,6 фоизга камайган;
• товар-хом ашё биржасида хом ашё сотиб олиш жадаллиги 0,4 фоизга ортган;
• фаолият кўрсатаётган хўжалик юритувчи субъектлар бўйича компонент 0,2 фоизга камайган;
• товар белгилари бўйича компонент 22,5 фоизга камайган.

Ҳудудлар кесимида Қорақалпоғистон Республикасида энг юқори ўсиш суръати қайд этилган.

2024 йил ноябрь ойида Ишбилармонлик фаоллиги индекси 7 та ҳудудда ўтган ойга нисбатан ўсиш кузатилган. Жумладан, Қорақалпоғистон Республикасида (39,8 %), Қашқадарё (35,4 %), Тошкент (12,2 %) вилоятлари ва Тошкент (6,5 %) шахрида сезиларли даражада ўсиш кузатилган (2 - расм).

Шу билан бирга, ушбу индекс қолган 7 та ҳудудда камайган бўлиб, бунда Сирдарё (19,4 %), Фарғона (13,1 %), Сурхондарё (13,0 %) ва Жиззах (9,4 %) вилоятларида сежиларли камайиш кузатилган.

2 - расм

БАНК ҲИСОБ ВАРАҚАЛАРИ БЎЙИЧА ОПЕРАЦИЯЛАР

2024 йил ноябрь ойида банклараро тўлов операциялари сони 5 913,8 мингтани ташкил этди ва 2024 йилнинг октябрь ойига нисбатан 419,1 минг транзакцияга (6,6 %) камайган.

Банклараро тўлов операциялари сони ўтган ойга нисбатан барча ҳудудда камайган.

2024 йил ноябрь ойида республиканинг 14 та ҳудудида юридик шахслар ўртасидаги банк операциялари сони ўтган ойга нисбатан камайган. Хусусан, Сурхондарё (16,5 %), Жиззах (12,7 %), Хоразм (11,9 %) ва Сирдарё (11,8 %) вилоятларида сезиларли камайиш кузатилган.

ТОВАР-ХОМ АШЁ БИРЖАСИДАГИ ФАОЛЛИК

2024 йилнинг ноябрь ойида ИФИнинг биржа компоненти 1,0038 бирликни ташкил этди. Бу эса, ушбу компонентнинг ўтган ойга нисбатан 0,4 фоизга ошганини англатиб, ҳар бир битим бўйича сотиб олинган товарларнинг ўртача ҳажми 16,2 фоизга ошганлиги ва тузилган битимлар сони 29,5 фоизга камайганлиги билан изоҳланади.

Республика товар-хом ашё биржасида товарлар савдосининг умумий айланмаси ҳажми 2024 йил ноябрь ойида 6 154,8 млрд. сўмни ташкил этиб, ушбу кўрсаткич ўтган ойга нисбатан 12,7 фоизга камайган.

ХЎЖАЛИК ЮРИТУВЧИ СУБЪEКТЛАРНИНГ ФАОЛЛИГИ

Фаолият юритаётган хўжалик субъектлари бўйича компонент 2024 йил ноябрь ойида 0,9985 бирликни ташкил этиб, ўтган ойга нисбатан 0,2 фоизга камайган. Бундан ташқари ушбу кўрсаткич ўтган йилнинг мос даврига нисбатан 2,8 фоизга мўътадил даражада камайган.

2024 йил ноябрь ойида барча турдаги фаолият юритаётган хўжалик юритувчи субъектлар сони ўтган ойга (496 368 бирлик) нисбатан 1 384 бирликка камайиб, 494 984 бирликни ташкил этган.

Йирик тадбиркорлик билан шуғулланувчи корхоналар сони 7 тага ошган.

Ҳисобот даврида, кичик корхоналар сони 402 209 тадан 400 870 тага камайган (камайиш 1 339 та). Шунингдек, фермер хўжаликлари сони 90 390 тадан 90 338 тагача (52 та) камайган. Йирик тадбиркорлик билан шуғулланаётган субъектлар сони 3 776 тани ташкил этиб, 2024 йилнинг октябрь ойига нисбатан 7 тага ортган.

БРEНДЛАРНИ РЎЙХАТГА ОЛИШ

2024 йил ноябрь ойида савдо белгилари муҳофазаси бўйича индекс 0,7754 бирликни ташкил этиб, ушбу кўрсаткич 2024 йилнинг октябрь ойига нисбатан 22,5 фоизга камайган. Жорий йилнинг ноябрь ойида юридик шахслар томонидан 480та товар белгилари ва товар номлари рўйхатга олинган.

Ўзбекистон Республикаси ва минтақалар бўйича ИФИ компонентларининг ўтган ойга нисбатан ўзгариши

Ўзбекистон Республикаси ва минтақалар бўйича ИФИ компонентларининг ўтган йилнинг мос ойига нисбатан ўзгариши

Иқтисодий тадқиқотлар ва ислоҳотлар маркази