“Ўзбекнефтгаз”: Мўйноқда кунига 220 минг куб метр газ олинадиган янги қудуқ ишга туширилди (Видео)
Ҳозирда ушбу қудуқ устини жиҳозлаш, уни газ коллекторига қўшиш ишлари бажарилмоқда.
“Ўзбекнефтгаз” АЖ Бошқаруви раиси Меҳриддин Абдуллаев топшириғига асосан Устюрт минтақасида табиий газ қазиб чиқариш учун кенг кўламли ишлар амалга оширилмоқда. Бу ҳақда “Ўзбекнефтгаз” АЖ матбуот хизмати хабар қилди.
Жумладан, қудуқларда капитал таъмирлаш ишларини бажариш бараборида, конларда янги қудуқлар ҳам бурғиланмоқда.
Устюрт газ қазиб чиқариш бошқармасига қарашли “Шимолий Бердақ” газ конденсат конидаги 102-сонли қудуқда амалга оширилган бурғилаш ишлари ўз натижасини берди.
Бурғилаш ишларидан тугатилган қудуқнинг 2640–2540 метр оралиғига фильтр туширилди.
Тезкор маълумотларга кўра, қудуқни ўзлаштириш ишларидан сўнг, кунлик 220 минг куб метр саноат миқёсидаги табиий газ ва 1,5 тонна газ конденсати қазиб чиқарилишига эришилди.
Бурғилаш ишлари “Ўзнефтгаз бурғилаш ишлари” МЧЖ томонидан олиб борилди ва ҳозирда ушбу қудуқ устини жиҳозлаш, уни газ коллекторига қўшиш ишлари бажарилмоқда.
Маълумот учун: “Шимолий Бердақ” газ конденсат кони Қорақалпоғистон Республикасининг Мўйноқ туманида жойлашган бўлиб, 2006 йилда ишга туширилган.
Изоҳ қолдириш