Тошкентдаги "Версал" ресторани сотилди
Тошкент шаҳридаги "Версал" ресторани аукцион савдоларига қўйилган эди. 15 июнь куни ресторан аукционда 35,33 млрд. сўмга сотилди.
Давлат активларини бошқариш агентлигининг ҳудудий бошқармаси Тошкент шаҳридаги "Версал" ресторанини аукцион савдоларига қўйган эди.
Сотувдан кўзланган мақсад — хусусийлаштириш, сабаби ресторан «Муниципиал активларни бошқариш маркази» ДУКнинг таъсислигидаги «Тантана сервис» МЧЖга тегишли.
Бино 0,33 гектар майдонни эгаллаган ва қурилиш майдони 6,5 минг квадрат метрни ташкил қилади. Бино фундаменти бетондан ва ўзи пишган ғиштдан қурилган. Газ, сув ва электр тармоқлари мавжуд.
"Версал"нинг бошланғич нархи — 34,6 миллиард сўм. Савдоларда иштирок этиш учун 1,7 миллиард сўм миқдорида закалат пули ўтказиш талаб қилинган. Лотда инвестицион мажбуриятлар белгиланмаган.
Аризалар 13 июнгача қабул қилинган бўлиб, савдолар эса 15 июнда ўтказилди.
"Версал" ресторани биноси аукционда 35,33 млрд. сўмга "DIAMOND DRINKS CO" МЧЖга сотилди.
Маълумот учун, "Версал" аукционга биринчи марта қўйилаётгани йўқ, 2011 йилда «Алп Жамол банк»ни тугатиш комиссияси ресторанни суд қарори асосида аукционга қўйганди. Ўшанда тўйхонанинг бошланғич нархи тахминан 37,5 миллиард сўм деб белгиланган.
2018 йилда "Версал" ресторани Tashkent City қурилиши сабаб бузилган Ezidyor’га эгалик қилган Grand Duet компаниясига берилиши мумкинлиги ҳақида гап-сўзлар тарқалган.
Якунда компанияга Мирзо Улуғбек туманидаги Саёҳат ресторани насиб қилди. «Саёҳат» ҳам 2011 йилда «Алп Жамол банк» иши туфайли аукционда савдога қўйилган тўйхоналардан бири.
Изоҳ қолдириш